Abasekeli beMDC ekhokhelwa nguMnu Morgan Tsvangirai abalitshumi lambili bamiswe phambi komthethwandaba kamantshi eHarare ngoLwesihlanu besetheswa icala lokubulala ipholisa, uMnumzana Petros Mutedza ngeSonto edluleyo eGlen View.
Abantu laba balilandule lelicala njalo abanye babo babikwa bebevuvukile belamanxeba okutshaywa kakubi ngamapholisa.
Igqwetha labo uMnu Charles Kwaramba utshele umthethwandaba ukuthi izibotshwa lezi zitshaywe ngamapholisa efuna zivume ukuba yizo ezibulele uMutedza.
Abamiswe emthethwandaba laba bagoqela ilunga leNational Executive yeMDC kaTsvangirai uMnumzana Last Maengahama labafowabo abathathu abathi uMnu Stanley, Edson loLazarus. Bagoqela njalo ukhansila Tungamirai Madzokere, uYvonne Musarurwa kanye labanye.
Abanye abalitshumi lantathu babikwa belakho ukukhululwa. Kulembiko yokuba uhulumende ufuna ukubasebenzisa kulelicala njengabafakazi.
Umsekeli wesikhulumeli seMDC kaTsvangirai uNkosazana Thabitha Khumalo usole kakhulu ukuhlukuluzwa kwabasekeli bebandla lakhe ngamapholisa.
Isikhulumeli sebandla leZANU-PF uMnu Rugare Gumbo uthi abasekeli beMDC laba kumele bejeziswe kabuhlungu.
Kunjalo nje, ukufuthelana eGlen View kubikwa kuqhubeka njalo inhlanganiso emela izakhamizi zakulindawo ithi amapholisa sefake umthetho wokuthi wonke umuntu abe sesendlini ngehola lesikhombisa.
