Abatsha abakubandla leZanu PF bathi kabavumelani lomunye wabo, uGodfrey Tsenengamu, ofuna ukuthi uMongameli Emmerson Mnangagwa akhulumisane loMnu. Nelson Chamisa, umkhokheli webandla leMDC, ukuze kulungiswe okunengi okuhluphayo kwele Zimbabwe.
Abakuhlangothi lwabatsha kubandla leli olweYouth League bathi uMnangagwa akumelanga akhulumisane loChamisa ngoba wanqoba kukhetho olwenziwa ngomnyaka ka2018 njalo ulenkundla yezombusazwe eyePolitical Actors Dialogue lapho axoxisana khona lenkokheli yamabandla atshiyeneyo ngokwenzakala eZimbabwe.
Osaphethe isikhundla somkhokheli wohlangothi lolu, uTendai Chirau, uthi uChamisa kumele angene kunhlanganiso yePOLAD nxa efuna ukukhulumisana loMnangagwa hatshi ezimele yedwa.
Kodwa uTsenengamu uthi kuqakathekile ukuba uMnangangwa akhulumisane loChamisa ngokwenzakala elizweni.
Ingcwethi kwezombusazwe zithi kuyamangalisayo okwenziwa ngabasakhulayo bebandla leZanu PF abakhanya belemibono etshiyeneyo ngodaba lolu. UMnu. Bekezela Gumbo, okuhlanganiso yeZimbabwe Democracy Institute, uthi abalandeli bebandla leZanu PF bajayele ukwenza lokhu nxa belwisana.
Ibandla leMDC lithi uChamisa angeke angene kunhlanganiso yePOLAD ngoba wanqoba uMnangagwa kukhetho olwenziwa ngomnyaka ka2018.
UTsenengamu uthi labanye bakhe sebezenza umkhankaso obizwa ngokuthi yiZimbabwe First Movement owokuzama ukuthi uMnangagwa akhulumisane loChamisa kulungiswe umnotho obhidlikayo lokunye kwele Zimbabwe.
UTsenengamu, uPupurai Togarepi loLewis Matutu basanda kumiswa ukuba bekhokhele uhlangothi lwabatsha kulandela ukwethula kwabo umbiko wokuthi kulabo somabhizimusi eZimbabwe ababhidliza umnotho ngokwenza ubukhohlakali.
Osomabhizimusi laba kukhanya engani badlelana lenkokheli yebandla elibusayo.
Bathi abenza lokhu nguMnu. Tafadzwa Musarara owenhlanganiso yeGrain Millers Association, umqondisi weGreen Fuel Private Limited uMnu. Billy Rautenbach, loMnu. Kuda Tagwirei, umqondisi wenkampani yeSakunda Holdings. Abathathu laba bayakuphikisa lokhu.
