Inhloko kahulumende yesabelo saKwaZulu Natal kweleSouth Africa umnumnzana Sihle Zikhalala, usefunge wagomela ethi uzaluqeda du, uhlupho lokuhlaselwa kwabatshayeli bamaroli ababuya phandle kwelizwe lokutshiswa kwamaroli abo kulesi sabelo. Inengi labatshayeli beZimbabwe bathwele amagabha avuzayo ngaloluhlupho.
Ekhuluma labezindaba ngemva komhlangano awuqhube leziphathamandla zesabelo lesi phezu kwendlela afuna izinto zihambe ngayo, uZikhalala uthe izenzo zabahlasela amarolila zifana lokwenqabela intuthuko yalesi sabelo.
“Asisoke sikuvume lokho. Sizasebenzisa umthetho. Sesitshele amapholisa ukuthi abophe bonke abatshisa amarolila. Akekho esizamtshiya phandle.”
Sekulezinyanga kuqhamuke impi phakathi kwabatshayeli bamaroli bakwamanye amazwe labakweleSouth Africa. AbakweleSouth Africa bethesa abakwamanye amazwe umlandu wokubathathela imisebenzi.
Banengi abatshayeli abatshaywawo abanye betshiselwa amaroli kuloludlakela.
Nomakunjalo umphathintambo wogatsha lwezokuthutha umnumnzama Fikile Mbalula, uthi bafuna lokukhangela insolo ezithi kulabatshayela amarolila bengelamvumo yokuba selizweni.
“Sizasebenzisa imithetho yemisebenzi kuleli ukuze abakweleSouth Africa kube yibo abanengi kwezokutshayela amaroli. Sizakhupha bonke abatshayela ngokungekho emthethweni lokujezisa ababaqatshileyo.”
Ukungenela kukahulumende waKwaZulu Natal kuloludaba sekwemukelwe ngezandla zombili ngabatshayeli bamaroli beZimbabwe, inengi labo abaphatheke kabi kakhulu ngalokhu kuhlasela. Omunye wabatshayeli laba ongathandanga ukuthi igama lakhe livezwe, uthi uhlupho yikuthi abahlaselayo laba bahlasela ngitsho labatshayeli abalemfanelo zonke zokwenza lumsebenzi.
“Thina into ebesiyicela yikuthi singabantu besizwe silapha, singabatshayeli sinjalo silapha ukuthi ugovernement walapha, wakuleli waseSouth Africa asibone asimele nathi ngokuba bayayazi isituation esekhaya kithi lapha esivela khona.”
Umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi isisombululo yikuthi abatshayeli bakwamanye amazwe baqoqane basebenze ndawonye.
“Sibagqugquzela kakhulu ukuthi kumele bajoine amatrade union aseSouth Africa, lapho esizabe sikhuluma khona lohulumeni waseSouth Africa ukuthi udaba lokutshisa ama truck luphele njalo futhi sifaka lezikhalazo zabatshayeli abavela eZimbabwe.”
Kusenjalo abanye babatshayeli laba sebesungule inhlanganiso yabo abayibiza ngokuthi SADC Drivers Association ngethemba lokuthi izakwenelisa ukuqeda uhlupho lolu.
