Abazali abanengi kanye lababalisi bahlabe omkhulu umkhosi nyakenye leyi indlela yezifundo kumbe icurriculum isethulwa ngobengumpathintambo wemfundo ngaleso sikhathi uMnu. Lazarus Dokora. Kuthe ngokuguquka kukahulumende kwafakwa umpathintambo omutsha abantu abanengi bathaba benakana ukuthi le icurriculum isizaguqulwa kubuyelwe kwendala kodwa akubanga njalo.
UMnumzana Wellington Msipa omunye wabazali uthi uhulumende kumele ananzelele icurriculum le ingakhohlwa abasemaphandleni.
Omunye njalo uMzali uMnu. Tafadzwa Herbet uthe bona njengabazali abala mali yokuthenga inengi yemphahla enjengamacomputer esifunakala ukuthi abantwana befunde ngendlela entsha.
Umbalisi, uNkosikazi Primrose Sibanda yena uthe icurriculum le intsha inhle kodwa iphangiselwe njalo uhulumende bekumele aqale abeke eceleni imali yankona andubana aqhube lolohlelo.
UNkosikazi Sibanda uphinde wathi ababalisi kumele bafundiswe indlela lezi ezintsha ngoba labo bengazilutho ngalokhu.
UNkosikazi Sandisiwe Mlotshwa ungumbalisi kwesinye isikholo esiseHarare. Yenake uthi uhulumende kumele ancede isikhathi sisasekhona ngoba akula mzali othanda ukubona umntwana engaphumeleli ezifundweni zakhe ngenxa yecurriculum le entsha.
Ugatsha lukahulumende lwezemfundo lusungule uhlelo olutsha lokufundisa izifundo osekulethe ukungazwisisi lokukhonona ebazalini kanye lababalisi abangayizwisisiyo labo icurriculum entsha le.
