amalinks wokungena

Breaking News

Abomkhankaso we Occupy Africa Unity Square Campaign Besabela Impilo Zabo


U-Itai Dzamara intathelizindaba eyathunjwayo elokhe ingaziwa ukuthi ingaphi

Abomkhankaso we Occupy Africa Unity Square campaign abasebenza lentathelizindaba eyathunjwayo u-Itai Dzamara, ongaziwayo lapho akhona okwamanje, bathi sebesesabela impilo zabo, ngoba sezisanda izehlakalo zokuhlukuluzwa ngenhloso yokubethusela, ngemva kokuba ababili babo belandelwe ngabantu abekade bengabazwisisi, ngesikhathi sekhefu lePasika elisanda kwedlula.

Amalunga awe OAU Square la, abalisa okhokhela uhlangothi lwabontanga ebandleni le Mavambo/Kusile/Dawn, umnumzana Stephen Sibanda kanye lonobhala jikelele kuhlangothi lwezentuthuko kwezenotho kwelinye njalo lamabandla aphikisayo ele ZAPU elikhokhelwa ngu Dr Dumiso Dabengwa, umnumzana Loyd Pasi Masarirambi.

UMasarirambi, utshele intathelizindaba ukuba unanzelele ngolweSibili olwedluleyo ukuba bakhona abamlandelayo ngesikhathi esedolobheni ngemva kokuba lamadoda, abeyisitshiyagalombili, ebehamba

ngemota yohlobo lwe Isuzu Twincab, bezenza izisebenzi zikamanisipala, bemphosa ilihlo sikhathi sonke ukubona ukuba uzalubhekisa kuphi.

Kungemva kokuba ezwakale ekhulumela phezulu ngabomo, etshela abekade emi labo ukuba usake ayengena esambusi,walandelwa kanti yena ucatshile, akangenanga kuleso sambuzi.

Kabili phakathi kwalelikhefu,lapho uMasarirambi aye wayalala kuzihlobo emzini we Mufakose le Norton, ngemva kokuba omakhelwane bemncwebe indlebe, ukuba angaze aza ngekhaya ngoba kukhona abantu abasolekayo abamdingayo.

Kube ngesifanayo lakuSibanda, otshele intathelizindaba ukuba uhlangane lazo izehlakalo zokulandelwa ngabantu angabaziyo njalo besolisa, okwekhefu lonke, ubebona imota inye yohlobo lwe Isuzu twincab ibucwadlana lalapho ahlala khona ngezikhathi ezisolisayo, kwamenza wayalala ezihlotsheni zakhe.

Njengabanye bakhe, uSibanda uthi akayi kubuyela muva kulomkhankaso wokulwela ilungelo loluntu lanxa esazi mhlophe ukuba impilo yakhe isengozini.

Lanxa eke wayamangala emapholiseni esikhathini esedluleyo phezu kwezehlakalo ezifanayo, akasazihluphi ukuyadinga usizo kibo ngoba engasawathembi ngemva kokuba emhlukuluzile uSibanda eye dinga usizo kiwo.

Omunye wamalunga e OAUS, enguye njalo osaphethe isikhundla sokuba yisikhulumeli endaweni kaDzamara, umnumzana Dirk Frey uthi lokho osekusenzakala kungabamangalisi, ngoba bekuvele kusenzakala, umahluko kuyikuthi sezisanda izehlakalo zakhona.

Amalunga la athi lokhu akuyikubabuyisela muva kulomkhankaso, kubapha amadlabuzane wokuba baqhubekele phambili ngawo kungakhathalekile ukuba bahlangana lobunzima kuze kufezeke lokho abangakho.

Batshele intathelizindaba ukuthi aye ayadinga usizo enhlanganisweni ye Zimbabwe Lawyers for Human Rights ngemva kokunanzelela ukuba sezisanda lezi zehlakalo zokulandelwa ngabantu abangabazwisisyo, njengalokho obekusenzakala ku Itai Dzamara waphetha esengothunjiweyo.

NgolweSine lweviki edluleyo, amagqwetha enhlanganiso ye ZLHR la, abuyele njalo edale le High Court, efuna idale litsho phezu kokuqholoza kwamapholisa, angalandeli isinqumo esenziwa yilelidale, sokuthi amapholisa, azise amagqwetha alinhlanganiso ngemva kwamaviki amabili ukuba sebekusibanga siphi emsebenzini wabo wokudinga u-Itai Dzamara selokhu wanyamalalayo.

Lokho kungakenziwa selokhu lesisinqumo senziwa, okwenze amagqwetha akubona kufanele ukubuyela edale ukuze silandelwe isinqumo esethulwe ngenyanga edluleyo.

XS
SM
MD
LG