amalinks wokungena

Breaking News

Abenhlanganiso yeOperation of Hope beMelika Bahlinza Abantu eMpilo Hospital


Abenhlanganiso eye Operation of Hope.

Umkhokheli wequla labelaphi laba, uDokotela Jennifer Mora, uthi bazaphenduka njalo umnyaka ungakapheli bezoqhuba msebenzi munye ngoba eZimbabwe usizo lwabo luyadingeka bebanengi abantwana abazalwa belendebe ezidabukileyo.

UDokotela Mora uthi iqula lakhe libunjwa ngodokotela labongi abavela eMelika lakwamanye amazwe emsebenzini abawuqala eZimbabwe ngomnyaka ka2006 eHarare bazowuqelisa ukuze bahlinze lakoBulawayo ngoba bananzelela ukuba abantu bahamba umango omude besiya eHarare.Lonyaka baqalele ukuhlinza koBulawayo kuthike ngeviki ezayo baye eHarare.

UMatron Sibusisiwe Faith Ndlovu isikhulumeli sesibhedlela seMpilo uthi NgoMqgibelo bahlole abantu abedlula amatshumi amahlanu kodwa kuzasizwa abangamatshumi amane lasifcaminwe mibili abelaphi laba bazasebenza koBulawayo okwensuku eziyisithupha kuphela.

Uqhubeke ethi lumsebenzi mukhulu njalo ubiza imali enengi okwenza abantu bekhanywe yimali ekuzelaphiseni ngakhoke lonyaka abeOOH bengeze amalanga okusebenza ukuhlinza abalalesi simo sendebe.

UNkosazana Simangaliso Ndebele uze lomntanake uTinotenda Shumba ohlinzwe indebe yomlomo izolo.

Abanye lokhe belinde ukuthi ingane zabo zihlinzwe, abagoqela uNkosikazi Limukani Gumbe olandisa ngodubo olubhekane lengane yakhe.

Omunye nialo umzali olengane elinde ukuhlinzwa indebe, uNkosazana Nozimanga Mathe yena eyakhe kayizalwanga injalo kodwa yatshaywa ngamandla kagetsi.

UHulumende weZimbabwe encedisana lenkampani yamanamnede eyeSchweppes kunye leRotary Club bancedisile kuloluhlelo lokuhlinza indebe lesilakalaka.

Inhlanganiso yeOOH isike yaqhuba lumsebenzi emazweni abalisa iZambia, Malawi lamanye aseAsia. Lihlanganiso ibunjwa ngodokotela abahlinza indebe lezilakalaka kuphela abazinikelayo ukwenza lumsebenzi kungelambadalo, bayazihlawulela indleko zokuhamba lokwenza umsebenzi besuka emazweni abo okungabiza imali edlula isigidi samadola eMelika kuhlangene lemithi.

UDokotela Mora uthi phakathi kwabantwana abangamakhulu ayisificamunwe mibili lamatshumi amahlanu abazalwa eZimbabwe ngelanga oyedwa uzalwa elendebe kumbe isilakalaka esidabukileyo. Ethi abantwana abazalwa lalesi simo bakhula nzima ikakhulu ekudleni, ukudla kucina kuphuma ngamakhala kubangele eminye imikhuhlane lokuhisthwa yikudla.

UDokotela Mora uthi phezu kokuhlinza abantu bayafundisa odokotela labongi beZimbabwe ukuqhuba lumsebenzi. Longumsebenzi owaqalwa nguyise uDokotela Joseph Clawson owabumba lihlanganiso, okwamanje ubhoda lamazwe efundisa odokotela labongi ukuthi indebe lesilakalaka esidabukileyo sihlinzwa njani.

Udaba lokuhlinzwa kwabalendebe ezidabukileyo siluphiwa nguAnnahstacia Ndlovu
please wait

No media source currently available

0:00 0:04:25 0:00

Facebook Forum

XS
SM
MD
LG