amalinks wokungena

Breaking News

Toronto FC: Sesizabopha ziqine Ukuze Sinqobe Lonyaka


Toronto FC

Iqembu le Toronto yilo elihlezi emsileni wengalane yemiklomelo kusigaba se Southern Region Division One Soccer League ngemva kokuba sekudlalwe imidlalo emihlanu lapho elenelise ukuthola khona imiklomelo emibili phakathi kwelitshumi lanhlanu ebidlalelwa.
Leliqembu lingene lonyaka kusigaba se Southern Region Division One Soccer League ngemva kokuba liqede lisesiqongweni sengalane yemiklomelo kusigaba se Bulawayo Province Division Two nyakenye.
Umqeqetshi weqembu le Toronto uGift Ghetto Nkala uthi bebengadlali kuhle njengoba bebatsha kusigaba se Southern Region Division One kodwa sebejwayele njalo sebezaqala ukunqoba.

Ithimu iyadliwa kodwa siyeza asikho ukuthi sikhatshana singenelisa ukunqoba ngempelaviki leyi eminye imidlalo elandelayo sizabe sesitshaya eziwayo. Okwakhathesi besisabona ukuthi kuyini okwenzakala kuDivision One njengabantu abavela ku Division Two.

Ukaputeni weqembu le Toronto uMgcinimuzi Moyo uthi bebesalungisisa indlela abadlala ngayo ngoba kulabadlali abatsha abambalwa kuqembu labo kodwa sebejwayelene khathesi.

I combination ibingakahlangani kuhle kodwa kumidlalo edluleyo besesidlala ngcono kulokubambana okokuthi kumidlalo elandelayo sizaqala ukuthola imiklomelo.

Umsekeli kakaputeni uPhindani Ngwenya laye ugcizelele ukuba bazimisele njengabadlali ukuba beqale ukuthola imiklomelo.

Into esingayo vele yikuthi sizame ukuthi sithole imiklomelo njalo ngendlela esenza ngayo sizimisele ukuthi siwathole njalo kumidlalo elandelayo kumele sibone ukuthi senza khonalokhuyana esasivele sikwenza njalo labalandeli sibathembisa ukuba bengalahli ithemba sikhona njalo kasikhangelanga phansi.

Emdlalweni walo olandelayo iqembu le Toronto lizadlala lele NRZ Tigers ngoMgqibelo enkundleni ye Luveve kutshaya ihola letshumi lambili.
Kweminye imidlalo yangempelaviki ezadlalwa kusigaba se Southern Region Division One Soccer League iqembu le Main Line lizemukela ele Tsholotsho ePlumtree, iqembu le Makomo lizadlala lele Bosso 90 ngase Mpumalanga, iqembu le Zim Leopards lizangqikilana lele ZRP Bulawayo Province ngase Raylton, iqembu le Hwange lizadlala lele Moto Moto ngase Colliery, iqembu le Casmyn lizadibana lele Talen Vision ngase Turk Mine, ele Indlovu Iyanyathela lizadibana lele ZPC Hwange ngase Lookout Masuku Barracks kuthi ele CIWU lizadlala lele Mosi Rovers eCrescent.

Facebook Forum

XS
SM
MD
LG