Abenhlanganiso ye Botswana Federation of Trade Unions (iBFTU) bafole betshengisela emigwaqweni yeGaborone ngoLesihlanu ekuseni ngaphambi kokuba bethule ugwalo lwezikhalazo emahofisini womphathintambo wezobudlelwano beBotswana lamanye amazwe womhlaba, phezu kodaba lokuhlukunyezwa kwabeZimbabwe abatshengisele ngenyanga edluleyo.
Emavikini asanda kudlula, kwabulawa abantu, kukanti abanye basala belimele, ngesikhathi kutshengiselwa phezu kukuqonga kwentengo yama futha ezimota, kanye lokubhidlika komumo womnotho jikelele.
AbeBFTU bathi bakhathazekile ngokwenzeka eZimbabwe, ngakho bacela uhulumende wabo ukuthi angenele, akhuze njengo makhelwane.
Unobhala jikelele wenhlanganiso le, umnunzana Thusang Butale uthi babone kufanele ukuthi banikeze uhulumende wabo incwadi yezikhalazo ngeZimbabwe, ukuthi ayeyinikeza umongameli Emmerson Mnangagwa...
“Sithumele lincwadi ngesandla sikahulumende wethu, ukuze akwazi ukuthi njengeBFTU, asithakazeleli okwenzakala eZimbabwe. Sijwayele ukuhambisa lezincwadi ze petition, mathupha kuhulumende weZimbabwe, kodwa khathesi sisebenzise uhulumende wethu, ukuze sithole impendulo.”
Okade emele umphathintambo obona ngobudlelwano beBotswana lamanye amazwe, onguye owemukele ugwalo lwezikhalazo olubhekiswe kuMongameli Emmerson Mnangagwa, uthembise ukuthi bazaludlulisela phambili luyefika kunkokheli yeZimbabwe...
“Silutholile ugwalo, njalo ngiyathembisa ukuthi sizaludlulisela phambili kumphathintambo obona ngobudlwelwano lamanye amazwe, njalo lokuthi luyafika kunkokheli yeZimbabwe. Siyethembisa kulokhu.”
OweZimbabwe ophatheke kulokhu kutshengisela, umnunzana Andreas Sibanda uthi kuyinto enhle ukubona ukuthi izizalwane zeZimbabwe zilosekelo emazweni afana leBotswana, South Africa kanye leNigeria,
lapho inhlanganiso zezisebenzi ezitshengisele ziveza insolo yazo ngokwenzakala eZimbabwe.
“Kuyathembisa uma sibona amanye amazwe esola okwenzakala eZimbabwe. Kuyatshengisa ukuthi kasisodwa njalo kusipha ithemba.”
Kugwalo olulotshelwe uMnangagwa, abeBFTU bathi inkokheli yenhlanganiso yeZimbabwe Congress of Trade Unions egoqela umongameli wayo umnunzana Peter Mutasa kanye lonobhala jikelele, umnunzana Japhet Moyo, kumele bakhululwe.
