amalinks wokungena

Ibandla leMDC-T Limisa Umsebenzi Umqoqi Wenhlelo uAbednico Bhebhe

  • Ntungamili Nkomo

UMnu. Abednico Bhebhe

Ibandla leMovement for Democratic Change (MDC) elikhokhelwa nguMnu. Morgan Tsvangirai ngoLwesihlanu limise umsebenzi umqoqi wenhlelo zalo, uMnu Abednico Bhebhe, limethesa icala lokwethula emaphephandabeni amazwi alingcolisayo.

Isinqumo lesi sithethwe lidale leNational Executive emhlanganweni eliwenzele eHarare ohluze kabanzi udlakela oluqhamuke kulelibandla koBulawayo kumaviki asanda kwedlula.

Umhlangano lo unqume njalo ukuthi umsekeli wesikhulumeli seMDC-T, uNkosazana Thabitha Khumalo, kumele ebuyiselwe esikhundleni eqhubeke ngomsebenzi wakhe ngemva kokumiswa esetheswa icala lokuphatheka kudlakela lolu.

Kodwa uMaKhumalo ufunyanwe emsulwa liqula ebelicwayisisa ngodaba lolu.

INational Executive inqume njalo ukuthi umsekeli kamgciningcebo webandla, uMnu Charlton Hwende, eqhubeke emiswe umsebenzi.

UHwende wetheswa icala lokutshotshozela udlakela lwakoBulawayo lapho okwatshaywa khona umsekeli kaMnu. Morgan Tsvangirai, uNkosazana Thokozani Khupe.

Lanxa uBhebhe, uMaKhupe lomgcinisihlalo webandla, uMnu Lovemore Moyo, bengamalunga eNational Executive, kabahambanga emhlanganweni wedale leNational Executive, okuveza sobala ukufuthelana okuqhubekayo kulelibandla phakathi kwexuku elisekela uTsvangirai lelisekela uMaKhupe.

UBhebhe utshele iStudio 7 ukuthi ubengeke ekhulume ngokumiswa kwakhe umsebenzi ngoba ebengakaziswa libandla.

UNkosazana Khumalo yena uthi uyathokoza ngokubuyiselwa kwakhe esikhundleni sakhe.

Facebook Forum

XS
SM
MD
LG