Abalandeli bebandla leMDC ekhokhelwa nguMnu. Nelson Chamisa bebehlabela bekhumbula indodana yowayengumkhokheli wabo uNkosikazi Vimbai Tsvangirai Java.
Ekhuluma eseGlenview South, isabelo esasimelwa ngumuyi edale le phalamende, uChamisa uthe intsha yakuleli layo sekumele ilandele isinqumo sokuzinikela ukuletha inguquko elizweni.
UChamisa uthe sesifikile isikhathi sokuthi intsha isukume itshengisele ukuze iveze ukuthi isizinzile isingathatha intambo zobukhokheli njengalokho okwenziwe nguNkosikazi Tsvangirai Java ofundele lokhu elandela amasondo kayise, umuyi uMnu Morgan Tsvangirai.
“Intsha ye Africa lesi yisikhathi senu. Akusilodubo oluse Zimbabwe kuphela, kodwa lolu ludubo olukhona kwele South Africa, kwele Rwanda, kwele Uganda, kwele Kenya. Intsha kumele isukume ivikele izwekazi leAfrica. Yikho uVimbai wazinikela ngoba kukini njengentsha ukuthi lizinikele”
AbeMDC kanye labezokholo babuthene emzini weGlenview South lapho abancome umsebenzi kaNkosikazi Tsvangirai Java ongomunye wabesifazane abalutshwana abazinikela ukuphatheka kwezombusazwe.
Omunye walabo abakade bezovalelisa umuyi, umnumzana Nqobani Sithole umchaze njengesibonelo esihle kwabasakhulayo engasebenzisisanga udumo lukayise ukuqansa esibangeni akade esekuso.
“Umuyi uVimbai Tsvangirai Java, ubengumuntu ongazange azame ukusebenzisa ibizo likababa wakhe kwezombusazwe, wazenzela izinto zakhe, walungisa ibizo lakhe yena yedwa ecele indoda yakhe, wacela njalo uChamisa okhokhela ibandla le MDC. Lokhu kusitshnegisa ukuthi wayengumuntu owayelembeko ukuthi yena uyazenzela izinto zakhe engelakuhlupha abantu ecela uncedo.
Ekhuluma embuthanweni wokuvalelisa umuyi, uMnu Ostallos Siziba omela abatsha kubandla leli uthe uNkosikazi Vimbai wasebenzela ubuhle bebandla lenkonzo yakhe.
Isidumbu sika muyi siqale sasiwa esigodlweni sebandla le MDC eMorgan Tsvangirai House lapho eminye imigwaqo ike yavalwa kunikezwa abakade bezovalelisa umuyi ithuba lokubuthana.
Unkosikazi Vimbai Tsvangirai ukhangelelwe ukubekwa emathuneni aweGlen Forest eHarare NgoLwesine.
