amalinks wokungena

Breaking News

Abenhlanganiso yeNAYO Bathi Uhulumende Kahloniphe Ilungelo Loluntu


Abasakhulayo benhlanganiso yeNational Association of Youths Organisations- NAYO emhlanganweni wabo lentathelizindaba.

Abasakhulayo behlanganiso ye National Association of Youths Organisations - NAYO, bakhuthaza uhulumende ukuba aphume lemithetho esekela ukuhlonitshwa kwamalungelo oluntu, abantu bakhululeke ukuzikhethela ukuthi bafuna ukudlelana lobani, ukutsho imicabango yabo kanye levumela ukubuthana kwabantu kungakhathelikile ukuthi ngasizatho bani.

Ngakwelinye icele bakhuthaza abanye ontanga elizweni jikelele,
ukuba bazinikele ukuphatheka kunhlelo eziyabe ziqhutshwa elizweni okubalisa ingxoxo zokulungisisa isimo elizweni bakhulume ngalizwi linye ukuxazulula inhlelo zelizwe ezehlukeneyo okubalisa olwezemali olusanda kwethulwa ngabebhanga elikhulu lelizwe eleReserve Bank babone ukuba bona bami kuphi.

Lokhu kuphume emhlanganaweni lentathelizindaba wokwethula izifiso zabasakhulayo abafuna zilandelwe nguhulumende ekulondolozeni ilungelo loluntu lapho abantu befisa ukutshengisela ukukhonona kwabo ngendlela ezehlukeneyo ngokuthula.

Okuhlangothi olubona ngokukhankasela inhlelo zabasakhulayo kuNAYO, unkosazana Cordellia Sikhosana ulandisa okubafuqayo ukwenza linkuthazo.

“Sibone ukuthi kube lokubotshwa botshwa kwabasakhulayo emavikini aphelileyo lokuhlukuluzwa kwama Youth Organisations ngenxa yemisebenzi abayenzayo ngaphansi kwe Civic Space besebenzela abasakhulayo”.

UMaSikhosana uthi bathethe lalinyathelo ngemva kwesehlakalo sokwalelwa kwabasakhulayo ukufola besiya kusa incwadi yezikhalazo zabo edale lephalamende.

“Kule Constitution yelizwe lethu ngaphansi ka Section 20 ethi uhulumende enze kube le enabling environment for abasakhulayo ukuze baphatheke kundaba zomnotho, njalo lokukhulululeka i freedom of association, assembly and expression evumela ukuthi abasakhulayo babuye bahlangane bonke elizweni lethu leli jikelele. Becela ukuthi uhulumende labo bonke ama stakeholders ayenze konke okuhambelana lalokho okumunyethwe yi Constistution ngaphansi kwesection 58, 59 lo 61”.

Isakhamuzi semzini weGreystone Park umnumzana Collin Ncube uvumelana labasakhulayo laba.

“Singananzelela ukuthi isehlakalo esaba khona kwaba kubi kakhulu lohulumende laye wanika i warning enzima kakhulu khona kungenzeka futhi sizatshaya abantu, sizabopha abanthu sithini. Sikhuluma nje kulabantu abasemajele abangaziwayo lokuthi amacala abo yikuyini. Sinanzelela ukuthi akusela yona leyana I opportunity yokuthi batshengisele ngokuthula. Sekunikwa izizatho ezehlukeneyo singazi ukuthi abantu bemi ngaphi”.

UNcube uthi ukwenza kukahulumende kokungahloniphi sisekelo sombuso akumangalisi.

"Kusibonisa ukuthi uhulumende lo akalandeli imithetho yelizwe, akalandeli lokho isizalwane seZimbabwe esakukhulumayo lokukhulunywa njalo yi Constitution yethu eyeZimbabwe. Sekutshengisela ukuthi khathesi abantu sokuzaba lokwesaba kakhulu, sekuzaba lokuthi nxa umuntu efisa ukutshengisela engasakukwanisi khonalokho ngoba I Security Sector yakhona iyabe isivalile yonke izindlela ezokuthi abantu batshengisele".

Abasakhulayo laba bathi bazimisele emizameni eyenziwayo elizweni yokulondoloza ukuthula uqobo kanye lokuvunyelwa kokuphatheka kwabo ngokwaneleyo enhlelweni zokuthuthukisa ilizwe.

Udaba lwabasakhulayo beNAYO siluphiwa nguMavis Gama
please wait

No media source currently available

0:00 0:03:52 0:00

Facebook Forum

XS
SM
MD
LG