Abesifazana bamabandla ehlukeneyo awezombusazwe bahlangene ngoLwesithathu koBulawayo ngaphansi komanyano obizwa ngokuthiwa yiWomens Election Convergence bekhuthazana ukuthi bavotelane kukhetho oluzayo.
Abesifazana laba bebevela emabandleni agoqela elePeople’s Democratic Party (PDP), ele National People’s Party, amacele awe MDC-T akhokhelwa nguNkosazana Thokozani Khuphe loMnu. Nelson Chamisa, lamanye.
Inkokheli yesifazana yamabandla lawa egoqela uNkosazana Khuphe, uNkosikazi Priscilla Misihairambwi Mushonga, uNkosikazi Joyce Mujuru kanye loNkosikazi Lucia Matibenga bebekhona kulomhlangano bekhuluma ngempi ababhekane lazo emabandleni ezombusazwe njengabomama.
Unkosikazi Misihairambwi Mushonga uthe lumhlangano bawenze bejonge okukhuthazana njengabomama ukuthi babhalisele ukuvota njalo kwakukhangelelwe ukubhalisa omama abangaba yizigidi ezimbili kodwa khathesi bayajabula ngoba inani leli selifike izigidi phose ezintathu.
UMaKhuphe laye uthe uyajabula ngaleli nani esithi kumele omama bakhuthalele ukuyavotela abanye omama ukuze kube lenguquko elizweni.
UNkosikazi Lucia Matibenga uthe omama njengoba sebebhalisele ukuvota ngobunengi sokumele balwise ukuthi bavote ngobunengi.
Obemele ibandla leMDC T ekhokhelwa nguChamisa, uNkosikazi Phylis Ndlovu, wehlulekile ukukhuluma ngenxa yokuvinjwa ngabantu abaqale ukuhlabelela besithi into abayenzayo bayayizonda.
Utshele umsakazo weStudio 7 sokuphelile umhlangano lo ukuthi kuyadanisa okwenziwe ngabanye abesifazana abamise ukuthi akhulume.
Obemele Inhlanganiso yeThis Constitution, uNkosikazi Abigail Mupambi, usole omama abavimbe oweMDC-T ethi kutshengisa ukuthi kuseselomsebenzi ukuze umkhuba wokuzwana ube khona kuzulu.
Osakhulayo obemele iYoung Womens Alliance, uNkosazana Sikhangele Moyo, uthe njengabomama abasakhulayo balesifiso sokulandela lapho okunyathele khona abesifazana abazinkokheli okwamanje ethi yikho okubapha idlabuzane lokulwela amalungelo abo ukuthi benelise ukungena kwezombusazwe kungela bandlululo.
Facebook Forum