Umthethwandaba kaMantshi eHarare walele imvumo yokuhlawula isibambiso eseBail abesifazana beMDC Alliance oNkosazana Joana Mamombe, Cecelia Chimbiri loNetsai Marova. Abathathu laba betheswa icala lokuqamba amanga ukuthi bathunjwe Kanye lokuhlukunyezwa ngamapholisa ngenyanga edluleyo.
Umantshi Bianca Makwande, walele abathathu laba imvumo yokuhlawula isibambiso seBail ukuze benelise ukuthoniswa bevela emakhaya esithi ngoba icala labo lilikhulu kakhulu okokuthi nxa bethe bafunyanwa belecala balakho ukugwetshwa ukuhlala ejele okwesikhathi eside.
Uqhubeke ethi umbiko wabo wokuthi bathunjwa lokuhlukunyezwa kungcolise kakhulu isithunzi selizwe njalo bengavunyelwa ukuhlawula ibail balakho ukubaleka elizweni.
Umnumzana Jeremiah Bamu elinye lamagqwetha abathathu laba uthi ngokwethulwa kwalesi sinqumo kutsho ukubana bazaqhubeka bevalelwe lize liphele ukuthethwa icala labo. Kodwa uBhamu uthi kabajabuliswa yilesi sinqumo ngakhoke bazakhweza loludaba kumthethwandaba waphezulu besiphikisa.
Amagqwetha abathathu laba akhalaze edale ukuthi izihlobo labangane ziyalelwa ukuthi zibalethele ukudla kusukela ngoLwehlanu. Umantshi ulaye ukuba abohlangothi lwamajele olwe Zimbabwe Prisons and Correctional Services ubavumele ukuphathelwa ukudla kanye lokuqhubeka beselatshwa.
Abathathu laba bazabuyela edale mhlaka 26 walinyanga kaNhlangula.
AbeMDC Alliance, bethule umbiko besithi bakhathazekile kakhulu ngokuphathwa kwabathathu laba abalokhe beqhubekela phambili behlukunyezwa.
UMamombe, Chimbiri loMarowa babikwa baqamba amanga lapho besithi babotshwe ngamapholisa ngemva kokutshengisela emzini weWarren Park, eHarare mhlaka 13 ngenyanga edluleyo kaNkwenkwezi, bathunjwa besezandleni zamapholisa bazobonakala mhla ka 15 sebese Bindura.
Umpathintambo wezomvikela uMnu. Kazembe Kazembe utshele intathelizindaba ngeviki edluleyo ukuthi ulobufakazi obukhomba ukuba abathathu laba kabazange bathunjwe. Okungumbiko osekelwe ngumabhalani omkhulu kugatsha lwezokwethulwa kwemibiko uMnu. Nick Mangwana obhale enkundleni yokuxhumana eyebulenjini eyeTwitter yena othi ulemifanekiso yamavidiyo asekela umbiko kahulumende wokuthi baqamba amanga abathathu laba.
Nxa bengafunyanwa belecala balakho ukugwetshwa ukuhlala ejele okweminyaka engedluli amatshumi amabili.
Kolunye udaba intathelizindaba esebenza izimele uFrank Chikowore kanye loSamuel Takawira womsakazo owe263 Chat abetheswa icala lokungalaleli umlayo wamapholisa baphindele edale likaMantshi eMbare namhlanje kodwa icala labo ladluliselwa phambili ukuze baphindele edale mhlaka 25 yonale inyanga.