amalinks wokungena

Abesifazana Bhakhuthazwa Ukuthi Bavote Kukhetho Oluzayo


Inkokheli yamabandla ibithe gwaqa koBulawayo.

Abesifazana bakoBulawayo abaphatheka kwezombusazwe ngoLwesihlanu bahlangene eAmphitheatre behlafuna udaba lwamalungiselelo okhetho oluzakwenziwa ngomnyaka ozayo.

Bafuna ukuthi ukhetho luqhutshwe ngemfanelo.

Bakhuthazane ukuthi baphume ngobunengi babo babhalise ukuvota kukhetho oluzayo.

Bekhuthazana njengabasefazana hatshi ukubhalisa ukuvota kukhetho okuzayo luka 2018 kuphela kodwa lokucintisa ezikhundleni zobukhokheli ukuze kukhuphulwe inani labo edale lephalamende.

UNkosikazi Priscilla Misihairambwi Mushonga, umasungula ukusebenzelana kwabesifazana abakwezombusazwe, uthe ungumhlangano wabo wesibili ulandela abawenzele eHarare.

Isakhamuzi sakoBulawayo esiphatheka kwezombusazwe uNkosikazi Patricia Tshabalala uthi kuyamthabisa ukumanyana kwabesifazana lokhu.

Kodwa inengi labo belikhala ngodaba lwencwadi ezikhombisa ikheli abathi lulakho ukubavalela phandle ngoba bengelazindlu njalo kungelula ukubhalelwa incwadi ngumninindlu. Unkosikazi Evelyn Masaiti we bandla lePeoples Democratic Party uthi lolu ludaba asebalwethulela iZEC.

UNkosikazi Gladys Hadebe ongumgcinisihlalo wohlangothi lwabesifazana ebandleni leNational people’s Party ukhuthaza abesifazana ukuthi bengagwenxani.

Abesifazana bavumelane lokuthi abafuni umuntu ozatshaywa ngesikhathi sokhetho bethi abantu ababambane okugcizelelwe kutsho uNkosikazi Stylish Magida weZAPU.

KoBulawayo ngoLwesine bekulenjabulo phakathi kwabesifazana kulomoya wokubambana bekhuthazana ukuya kukhetho bebambene ngoba sesiside isikhathi bekhankasela abesilisa ukuba bababuse.

UNkosikazi Joyce Mujuru, uNkosikazi Thokozani Khuphe loNkosikazi Lucia Matibenga ngabanye babangene lumhlangano bekhuthaza abesifazana ukuba babambane. UNkosikazi Mujuru uthe abesifazana abayengena umhlangano wenhlanganiso yomanyano wamazwe omhlaba iUN bacele abesifazana beZimbabwe ukuba babambane ngesikhathi kuyiwa ekhethweni ngomnyaka ozayo.

Facebook Forum

XS
SM
MD
LG