amalinks wokungena

Abesifazane Abathengisa Imzimba Banikwa Amacondoms


Inhlanganiso le inika abathengisa imzimba amacondoms.

Inhlanganiso elwela amalungelo abaya emacansini koBulawayo iSexual Rights Centre isingezelele isilinganiso sokunikeza ama condoms abesifazana endaweni ezaziwayo ezidume ngokuba labantu abathengisa imizimba.

Inhlanganiso le yenza lokhu ukwenzela ukunqabela ukumemetheka kwegcikwane lengculaza leminye imikhuhlane ehambelana lezemacansini.

Lokhu kwenziwa ngesikhathi kucatshangelwa ukuba liyakhuphuka inani labantu abathengisa imizimba yabo koBulawayo ngenxa yokuswelakala kwemisebenzi.

Inengi labangena kubhizimusi lokuthengisa imizimba ngabasakhulayo abangela mali yokuqhubeka ngezifundo labanye abathathwa ludumo osekubangele ukuba lenani labantu eliqansileyo elabbamba umkhuhlane wengculaza koBulawayo.

Inengi labantwana abayekela isikolo ngesizatho sokuswela imali ngamankazana njalo yibo asebeqala ukungena kubhizimusi lokuthengisa ucansi ukuze banakekele abazali abangasebenziyo kuthi abanye yibo abayinhloko yemizi sebalehlekelwa ngabazali ngenza yengculaza.

Obona ngokwethulwa kwemibiko enhlanganisweni yeSRC, uMnu. Mojalifa Mokoele, uthe bahlose ukusekelela imizamo kahulumende lezinye inhlanganiso yokwehlisa inani labantu ababamba imikhuhlane yemacansini.

UMokoele uthe bapha mahala ama condoms adula emavinkilini.

Uthe amajazi omkhwenyana aholiswa nguhulumende mahala alephepha elilombala wesibhakabhaka omama abawathandi ngoba anuka kubi.

UNkosikazi Nonqaba Jamela, okubhizimusi lokuthengisa umzimba, uthe uyabonga uhlelo lweSRC lokupha abesifazana ama condoms amahala.

Inhlanganiso yeSRC ithe isiqalisile njalo ukupha ama condoms la abesifazane eSiphezini, eSigodini, esabelweni seMatabeleland South lezinye indawo ezilamatshe aligugu ezinjenge Gwanda, Beitbridge le Victoria Falls.

Uthe bazama ukwehlisa inani labantu abangaba legcikwane lengculaza.

Facebook Forum

XS
SM
MD
LG