amalinks wokungena

Breaking News

Abesifazane Bakhuthazwa Ukuthi Bengazafela Phakathi Nxa Behlukuluzwa


Udlakela ezindlini

Abesifazana edolobheni leGwanda sebekuthazwe ukuthi bengathandabuzi ukumangala emapholiseni nxa bethe bahlukuluzwa ngabesilisa.

Inkuthazo le iza ngesikhathi umhlaba wonke jikelele unanza umkhankaso wamalanga alitshumi lasithupha okulwisana lokuhlukuluzwa kwabomama obizwa ngokuthi yi16 Days of Activism Against Gender Based Violence.

Abesifazana abanengi babikwa befela ngaphakathi nxa bethe bahlukuluzwa ngomkabo ngoba besesaba ukulahlekelwa yimendo.

Lokhu kuvele embuthanweni wabomama obuqoqwe yinhlanganiso yeWomen Development Association in Zimbabwe (Wodaz) obugxile ekuhlukuluzweni kwabomama.

UMqondisi we Wodaz, UNkosazana Julieth Nkiwane, uthi inhlanganiso le iphathisa omama ababhekane lodlame emakhaya njalo ukhuthaze labo abahlukuluzwayo ukuthi bengesabi ukukhuluma.

UNkosazana Sibonginkosi Mlotshwa, osebenzela inhlanganiso ebona ngokwelamisa imuli, iFamily Planning Council of Zimbabwe, uthi bayaxoxisana lalabo abahlukuluzwayo ukuze bathole ukuthula ezinhlizweni zabo.

Uthi kulezinsuku njengabomama babhekane lokuhlukuluzwa ngendlela ezitshiyeneyo ezigoqela ukuswela imali emabhanga.

Abezempilakahle bathi isibhedlela esikhulu seGwanda sesilezakhiwo zokwamukela ebesifazana abahlukuluziweyo kumbe ababanjwe iganyavu.

UMamfundisi uSithobekile Kesi oweKingdom Life uthi bona njengebandla balendlela abalwisa ngayo udlwame njalo uthi abantu kumele baphenduke ukuze kube lokuthula elizweni.

Abagcini bomthetho bona baxwayise abesifazana abayabe bethe bahlukuluzwa ukuthi bengaze besaba ukuyamangala emapholiseni.

Obona ngobudlelwani phakathi kwamapholisa eGwanda lezakhamizi, uMnu Tapiwa Sibanda, uthi kwesiye isikhathi ukuhlukuluzwa kwabesifazana ngodlame kucina kubangela ukulahleka kwempilo nxa kuthe kwayekelelwa.

Kusukela mhla zingamatshumi amabili lanhlanu kuLwezi kusiyafika mhla zilitshumi kuMpalakazi minyaka yonke lamalanga abekelwe ukulwisana lodlame kwabesifazane.

Indikimba yalonyaka ithi “Leave no one behind: End Violence against Women and Girls okutsho ukuthi “Kungabi losalela emva, Aluqedwe udlame kubomama lakumantombazana”.

Facebook Forum

XS
SM
MD
LG