Uzulu wakoBulawayo uthi eleZimbabwe alisoze laba lokuthola nxa uhulumende eqhubeka ngombuso wakhe wocuku.
Lokhu kuphume emhlanganweni wokuhlolisisa ingxoxo yokuxazulula inkinga ezibhekane lelizwe, eyeNational Dialogue oqoqwe ngabe National Transitional Justice Working Group koBulawayo ngoLwesibili ntambama.
Umhlangano lo ubuthanise amalunga ekhomishini yokukhumisana umlotha eye National Peace and Reconciliation Commission (NPRC), owayelilunga le Truth and Reconciliation Commission eSouth Africa unkosikazi Yasmis Sooka, amalunga enhlanganiso ezizimeleyo kanye labafundisi bamabandla ahlukeneyo ezokholo.
Umnumzana Lucky Sibanda oyisakhamuzi sakoBulawayo uthi udlame alusoze lwaphela elizweni nxa abalukhokhelayo belokhe bebusa.
“Esesikunanzelela yikuthi as long kule government leyi iku power,ama chance okuthi kube le dialogue,kube le peace and kuphele udlami kuzaba nzima.Kulezinto ezinengi ezisadingaka ukuthi zilungisiswe especially nxa sikhangele ukuthi kuxoxiswane.Okokuqala siqalisela kuma elections,ukuthi wona vele ahamba njani,singasukela khonapho kungasenzela kuhle..”
Unkosikazi Pessive Nkiwane, owenhlanganiso yeCatholic Commission for Justice and Peace uthi uhulumende lo okhona wazingenisa embusweni.
“Mina engikubambisisileyo yikuthi uhulumende lo osikhokhelayo kakho emthethweni, unguhulumende owazingenisayo. So kumele thina njengabantukaza sibe lomfutho wokuthi silethe inguquko sesisenzela abantwabethu.So silomlandu thina esiphathi kwelizwe ukuba sibe lomfutho sisunduze labanye ukuthi asihlaleni phansi sikhulume .” Uyaqhubeka unkosikazi Nkiwane ethi isikhathi sesiside abantu bengazazi ukuthi bangobani.
“Nxa sibala ukuthi kusukela ngo 1962 kuze kufike khathesi sihlezi phakathi kodubo,sesize sesingasakwazi ukuthi siyimhlobo bani yabantu,esesikwazi yikuthi sihlala phakathi kukaZambezi loLimpopo,singomakhelwane be Botswana leMozambique.Kodwa thina asisela esingathi kukithi, sesinjengezihambi ngani singabantu abadlulayo,sigcwele umhlaba wonke ngoba izinto azimanga kuhle.”
UMnumzana Leslie Ncube ongukhomishina weNational Peace and Reconciliation Commission uthi bakhangelele ukuthi inhlelo zabo zipholise izilonda kube lokukhumisana umlotha.
“Kunhlelo zethu ze National Peace and Reconciliation Commission sikhangelele ukufinyelela abantu bonke hatshi emadolobheni kodwa sikhangelele ukufika lasemaphandleni.Ngakho sikhangelele ukuthi inhlelo lezi abantu bazazithakazelela njalo zipholise izilonda njalo ziyenze ukuthi abantu bezwisisane,bekhulumisane njalo bekhumisane lemilotha.”
Inengi labakade besembuthanweni wakoBulawayo lo, owenzelwe ehwetheleni eye Holiday Inn, ngoLwesibili ntambama, lithi kuqakathekile ukuthi ingxoxiswano zeNational Dialogue zenziwe eqinisweni njalo ziqoqwe ngumuntu ongekho kwelinye lamacele amabandla ezombusazwe ukuze zibe leqiniso.
