amalinks wokungena

Breaking News

AbeZESA Bakhuthazwa Ukutshiyana Lomkhuba Wobandlululo Lapho Sebefuna Ukubhadalwa Izikhwelede Zikagetsi


Uhulumende ukhuthazwa ukutshiyana lomkhuba wobandlululo emizameni yakhe yokufuqa abalezikwelede kunkampani yamandla ka getsi ukuba bahlawule inkampani ewaphekayo eye Zimbabwe Electricity Supply Authority. I–ZESA yetheswa umlandu wokubandlulula ngendlela ephatha ngayo abayanga labalemali loba abalezikhundla kwezombusazwe abayibo abalezikhwelede ezinkulu ukwedlula abathola iholo eliphansi.

Linkuthazo iza ngemva kwamazwi womphathintambo wezemihlobo yamandla kagetsi, uAdvocate Fortune Chasi emhlanganweni lentathelizindaba wokwethula okuhlafunwe emhlanganweni wedale labaphathintambo eleCabinet.

Inengi labantu lithi abalemali labalezikhundla kwezombusazwe kabaphathwa ngendlela efanayo labantu makhaza lanxa ubufakazi buveza ukuba yibo abalezikwelede ezinkulu ukwedlula abanye bonke.

Umqondisi wenhlanganiso yezakhamizi eye Harare Residents Trust – HRT umnumzana Precious Shumba uchasisa kabanzi ngokumele uhulumende akwenze ukusiza abenkampani ye ZESA.

Ukhuthaza umphathintambo wezamandla kagetsi, ukuba akutshoyo kungapheleli emlonyeni kuphela kungela nyathelo elithatwayo.

Omunye wamalunga e Board HRT, umnumzana Albert Mazula laye upha elakhe icebo.

Uqhubeke u Mazula ethi kungaba yiyona indlela engahlenga iZESA nxa kungalandelwa ngendlela okutshiwo ngu Chasi.

Kumele iZESA iqalele kunkokheli zengatsha zikahulumende, kumabandla ezombusazwe kanye labalezikhundla zaphezulu kumankampani lenhlanganiso kutsho uMazula.

Umgcinisihlalo we khomidhi ebona ngezamandla kagetsi edale lephalamende umnumzana Gabuza Joel Gabuza uthi kumele kukhangelwe njalo ukuthi lezo zikwelede ngezasiphi isikhathi kusetshenziswa luphi uhlobo lwemali elizweni.

Okunye kokubangele ukukhula kwalezi zikwelede yimisebenzi yenkohlakalo eZESA kanye lakunkokheli yengatsha zikahulumende.

Uhulumende uthi iZESA iyehluleka ukuhlawulela isikwelede samagetsi ewathenga kunkampani yakwele Mozambique eye Hydro Cabora Bassa kanye leye Eskom yakwele South Africa. Ukhala njalo uhulumende ngokuthi lokhu ngokunye osekubangele ukusilela kwamandla kagetsi elizweni okudala ukucitshwa kwawo sikhathi sonke ngoba emalutshwana.

please wait

No media source currently available

0:00 0:03:51 0:00

XS
SM
MD
LG