amalinks wokungena

Breaking News

AbeZimbabwe eSouth Africa Bafola Besola Umhloliso


Izizalwane zeZimbabwe ezidabuka eMandebeleni ezihlala kwele South Africa, zifolile ngoLwesihlanu zilubhekise esigodlweni sommeli weZimbabwe zisiyakhalaza ngomhloliso kaGrade 7 wolimi lweSindebele esingaqondanga, obhalwe ngabantwana lonyaka.

Kugwalo lwabo lwezikhalazo, abeSindebeleni laba abagoqela abenhlanganiso ezizimeleyo labantu makhaza, bakhuthaza ummeli weZimbabwe umnumnzana Phelekezela Mphoko, ukuthi azise ugatsha lwezemfundo ukuthi bafuna imihloliso ezayo ihlelwe zingcitshi zoqobo zolimi lweSindebele hatshi labo abazisikelela ehwahweni.

Lobanje inhlanganiso yezemihloliso eZimbabwe eye ZIMSEC isikhulume yaphinda phinda isithi umhloliso weSindebele ka Grade 7 walonyaka, wahlelwa zingcintshi zolimi lweSindebele, abeSindebeleni beZimbabwe abahlala kwele South Africa batshaya phansi ngentonga bethi alikho Ndebele loqobo elibuza abantwana ngamabala azilayo langekho esintwini.

AbeZimbabwe laba abagoqela inhlanganiso ezibalisa i Nqama, eyePure Ndebeles, Abalobi Bakithi lezakhamizi makhaza ezivela kweleMandebeleni, balubhekise esigodlweni someli weZimbabwe kwele South Africa ukuyakwethula insolo zabo. Bathi nxa kuliqiniso ukuthi umhloliso olamabala agoqela o-topi, omasalala lamanye azilayo wahlelwa zingcitshi, ubuNdebele balezo ngcitshi kufanele buhlolisiswe.
Bathi obekukulo umhloliso yikufundisa abantwana ukuganga okuyinto abathi kabasoke bayivumele iqhubekela phambili.

Unkosazana Sanelisiwe Mahlangu odabuka koGodlwayo eFelabhusi uthi esigodlweni seZimbabwe bebesiyadinga impendulo kuhulumende weZimbabwe ngomhlola womhloliso obhaliswe abantwana be Grade 7 lonyaka.

Umnumnzana Nkosinathi Nyathi oweqembu eliququzela ukulondolozwa kwamasiko eSindebele eleNqama, uthi lumkhuba wokutshaphazwa kolimi lwesiNdebele ngabomo bafuna uphele du.

Isakhamizi sakoBulawayo unkosazana Simanga Moyo uthi loba sekuthiwa akuselangcitshi zolimi lweSindebele esezisele elizweni, ngeke kudojwe loba kungabani.

Unkosazana Nomazulu Moyo yena uthi ukuhambo lwabo lolu belungalani lendaba zombusazwe, loba ukucwasana ngemihlobo, kodwa ludaba lokwakhela abantwababo ikusasa enhle kwezamasiko lolimi lwabo.

Ekufikeni kwaleli qembu esigodlweni someli weZimbabwe, umeli weZimbabwe u Ambassador Phelekezela Mphoko, ubanxuse ukuthi bangene phakathi, lapho afike axoxisana labo khona qede lapho bamupha incwadi yezikhalazo zabo. Ngemva kokubatshela ukuthi uhulumende uvele usephakathi kokukhangelisisa udaba lwemhloliso okukhulunywa ngayo, ubathembisile ukuthi izikhalazo zabo uzazithumela kugatsha lwezemfundo eZimbabwe.
XS
SM
MD
LG