Umonakalo obangelwe lizulu lesiphepo sika Cyclone Idai esihlasele indawo ze Manicaland eZimbabwe, sesibe yisibonelo sothando langozwelo olulabantu beZimbabwe ngemva kokuba abanengi befuqwe ukubuthanisa uncedo lwempahla, ukudla lemali kwabehlelwe yile ingozi.
Indawo zonke ezibuthaniselwa uncedo ezethekelelwe yi Studio 7 ziveze ukuthi akulalutho olwedlula uthando njalo uma abantu bezimisele balakho okunqoba ezikhathini ezinje.
Endaweni ebibuthaniselwa uncedo lolu enkonzweni yePresbyterian Church, emzini weHighlands, eHarare namhlanje emini bekusetshenzwa abadala labatsha befaka impahla ezimoteni ezifana lama rori lamakombi ukuthi ziyephiwa labo abaseChimanimani.
Ezinye indawo ezifana leRotary Centre lasezitolo zeEconet bekuyisiphithiphithi uzulu encedisa ngazo zonke indlela.
Unkosazana Mavis Dlomo isakhamuzi seHarare omunye ophathisa emsebenzini wokubuthanisa lokulayitsha ezimotheni uthi udubo osolukhona yikusilela kwezimota zokuthwala ukuze loluncedo luyefika eManicaland ngoba sokukunengi okumelwe kuthwalwe.
“Linto yeManicaland ilusizi kakhulu yikho libona sibambene labanye. Kungakho ke sesithumele iziqgoko ukuthi bayeqgoka. Okunya kuzakuza ngesonto. Namhla kulabanye abazthumeza.”
Abanengi bathi isenzo somusa lesi siphumelele kakhulu ngoba abantu nxa bengaxatshaniswanga ngabezombusazwe bayambana. Lokhu kuvezwe ngu Mnu Mlindelwa Macitshana.
“Abantwana be Zimbbwe sebetshengisele ukuthi babambene. Osukusokala yikuthi nkokheli yiyo exega abantu. Lapho kungela nkokheli abantu beZimbabwe bayamanyana, kuyatshengisa ukuthi njengabantu kazakana sesikhulile ukudla lapho esasikhona kuqala”.
UMancitshana usekelwe nguMnu Lazarus Maguta laye oyisakhamuzi se Harare okade encedisa ukulayitsha impahla emarolini aakade esiya eManicaland esuka enkonzweni eyePresbyterian namhlanje.
“Engikunanzeleleyo yikuthi kungela ezombangazwe abantu beZimbawe bayabambana. Sabambanisa imali sathumela okuyinto enhle etshengisela uthando lwethu”
Umnu Blessing Sithole esinye njalo isakhamuzi seHarare uthi uhulumende kumele aphange alungisise indaba zokuguquka komkhathi ukuze kwenqatshelwe izehlakalo ezinjengalezi
“Uzulu we Zimbabwe utshengise ukuthi ubambene ngemva kwalokho okwenzakele eChimanimani lokhu kusitshengisa ukuthi esintwibi umakhelwane yisihlobo sakho. Ngabe uhulumende wagijima ngesiphangiphangi nga abanye abalahlekelwanga yimpilo”.
Kusenjalo Imibiko evela kuhulumende ithi sebelikhulu lamatshumi amane lambili abantu asebebulewe yile ingozi kaCyclone Idai.
Abantu abangaba ngamakhulu amathathu babikwa lokhe bengazakali ukuthi bangaphi njalo uhulumende uqhubeka ecela inhlanganiso ezizimeleyo ukuthi zincedise kuloludubo.
