Umongameli Emmerson Dambudzo Mnangagwa usole kakhulu osomabhizimusi abakhweza intengo yempahla lokudla mahlayana, ikakhulu eyesinkwa esiqonge okwethusayo esithi lokhu kwenzakala ngesikhathi uhulumende ezama ngazo zonke indlela ukuthuthukisa umnotho welizwe.
U Mnangagwa utsho lokhu emkhosini owenzelwe enkundleni yeNational Sports Stadium, wokunanza usuku lokuthola uzibuse weZimbabwe lesimatshumi mathathu lasitshiyagalolunye.
Abaze emkhosini owenzelwe eNational Sports Stadium eHarare baveze injabulo ngesikhathi uMongameli Mnangagwa lomkakhe uNkosikazi Auxillia Mnangagwa bengena enkundleni.
Lo ngumkhosi wesibili oqhutshwa sokwagenqulwa umbuso kowayengumongameli Robert Mugabe ngemva kokuhluthunelwa intambo zombuso ngabebutho ngomnyaka ka 2017.
Emmazwini awethule kulumkhosi uMnangagwa uchaze osomabhizimusi abakhweze intengo yempahla lokudla ngesikhathi ilizwe lizama ukulungisisa umnotho, njengabantu abalocuku.
“Uhulumende wethuswa yikukhwezwa kwentengo yempahla mahlayana osekubangele ukuhlupheka okuphindiweyo kuzulu. Lokhu kwenza kwabosomabhizimusi lablungisa impahla elizweni kulucuku njalo kuphambana lalokho okukhuthazwayo kungxoxo kwezokuthuthukiswa komnotho welizwe okuyinto ekhuthazwa yilombuso omutsha. Uhulumende uzinikele ekuthi enze zanelise ukuthenga impahla izisebenzi zonke”
Okusekelwe ngumphathintambo wezemali, uProffessor Mthuli Ncube othi ukukhweza intengo ayisiyo ndlela enhle yokulungisisa isimo ezweni.
“Sonke siyakhala ngentengo yesinkwa kanti kwenzenjani bakithi ukuthi kuvuke nje, ilanga libalele sekukhwezwa ama prices,kuvela ngaphi khona lokho. Asikuthakazeleli sibona ingani kumele sikhulume, kumele kuxoxwe nxa kuyikuthi izinto ziyahlupha sibone ukuthi nje ukuthi uhulumende uhamba kanjani”
Inkokheli yezokholo ibikhona layo okubalisa u Bishop Cleopas Lunga webandla le Anglican church ekhokhela isigaba semaNdebeleni, ophiwe ithuba lokwethula amazwi kaNkulunkulu kulumkhosi lokuthandazela usuku lwalamuhla lapho agxile kakhulu ekuqakathekiseni ukumanyana kwabantu elizweni lasemhlabeni wonke jikelele.
Elizweni leZimbabwe sizakuba kwazi sonke lapho esivela khona, lapho esivela khona akulula. Kungelula kunjalo mhlawumbe sekuyisikhathi sokuba abantu bagezisane izinyawo.Kungasoze kube lula futhi ukuthi siqalisa njani. Kodwa ngokubeka zonke izinto emandleni kaNkulunkulu langokukhangelela ukuthuthuka, ukuthuthuka kwethu njengabantu lokuthuthuka kwelizwe jikelele kusafanele ukuthi sihlanganise amakhanda ukuthi udaba lokubambana lungaqala njani”.
Bebekhona abaze begqoke impahla yebandla le Zanu Pf okuyikho okuhlezi kusolwa ngabanengi ukuba makwehlukaniswe phakathi kwemicimbi yebandla leyelizwe lonke.
Okugcizelelwe ngumphathintambo wezokwethulwa kwemibiko unkosikazi Monica Mutsvangwa, ohe leli langa ngelomuntu wonke kungakhathelekile ukuti ngowaliphi ibandla.
Angizange ngibone loba oyedwa ogqoke impahla yezombusazwe kodwa engingakutsho yikuba lezi yimpahla abantu abaziphiwayo omunye ulakho ukuba kube yiyo kuphela angayigqoka. Kodwa okwalamuhla sithi lumkhosi wokunanza usuku lapho ilizwe lathola khona uzibuse kungolomuntu wonke jukelele kungakhathalekile ukuba ungowaliphi ibandla. Sayilwela linkululeko, ukwenza santando kwalethwa yilokho okwalelwayo kungakho thina sithi ngesikhathi limpi ilwiwa yayingalwelwa ibandla elithize kodwa yalwelwa umuntu wonke e Zimbabwe”.
Bebengabanengi kangako abaze emkhosini owenzelwe e National Sports Stadium njengalokho obekukhangelelwe, ngalesi sikhathi sombuso omutsha kaMnangagwa.
Abakhulumisane lalumsakazo bathi zinengi izizatho ezibangele leso simo okubalisa ukuba inengi selibona ingani imikhosi enje seyaba ngeyebandla le Zanu PF hatshi uzulu wonke.
Inkokheli labalandeli bamabandla ezombusazwe aphikisayo labo bebengekho kulomkhosi.
Omunye wabo kuyisikhulumeli sebandla le United African National Council – UANC elikhokhelwa ngumnumzana Nesbert Tonderai Mtengedzanwa umnumzana Alphios Mapuranga othi asikho isizatho sokuba lalumkhosi ngesikhathi ilizwe liphakathi kwesililo ngemva kwengozi yezulu le Cyclone Idai.
Ukuthi lina lithi liyabuthana lithakazelela uzibuse angiboni mina kuyinto elungileyo.Okunye kwakhona yikuthi ungakhangela into yonke ezitolo zezimphongukwela, ukelatshwa kuhle lapha ezibhedlela. Singathi yi Independence, ngibona ingani akusela Independence. So ngikhuthaza uhulumende ukuthi ngabe ilanga lalamuhla abantu bazihlalele ezindlini bakhumbule abanye babo abafayo e Chimanimani ngoba ukufa kwabantu e Chimanimani akusikho komuntu oyedwa ngolizwe lethu lonke.
Lanxa izulu line okwamagama awuzange umiswe lumcimbi wokunanza usuku likazibuse we Zimbabwe uMnangagwa ebhoda lisina ukubuka abezomvikela befola.
Ungenwe nguzulu we Harare lumkhosi, abameli bakwamanye amazwe, iziphathamandla zikahulumende kanye labakubutho.
Kunengi obekuhleliwe ukulibazisa uzulu okubalisa ama Mass Displays abesenziwa yizifundi ezivele ezikolweni ezitshiyeneyo, umculo obusethulwa ngu Alick Macheso, abesifazane be zanu PF kanye labakubutho.
