amalinks wokungena

Breaking News

Izizalwane zeZimbabwe Ziphatheka Lazo kuMandela Day


Nelson Mandela

Lokhu bekusenziwa njengendlela yokunanza ilanga lokuzalwa kukamuyi owaba ngumongameli wakuqala wakwele South Africa umnumnzana Nelson Mandela.

Minyaka yonke mhlaka 18 Ntulikazi umuntu wonke emhlabeni ukhuthazwa ukuchitha imizuzu engamatshumi ayisithupha lasikhombisa esenza loba yini encedisa ukuthuthukisa impilo zabanye abantu kungela mbandalo. Lokhu kwenziwa ukunanza umsebenzi omkhulu owenziwa ngumuyi owaba ngumongameli wakuqala wakwele South Africa ekhululekileyo umnumnzana Mandela.

UMandela wazalwa mhlaka 18 Ntulikazi wachitha iminyaka engamatshumi ayisithupha lasikhombisa esebenzela inkululeko lempucuko yabantu kweleSouth Africa.

Izizalwane zeZimbabwe kweleSouth Africa lazoke zimanyene lozulu ekwenzeni okuhle.

Abanye bachithe usuku bencedisa ngokutshiyeneyo, ezibhedlela, emizini ehlala asebegugile, endaweni ezigcina izintandane lezinye indawo ezihlala abahluphekayo.

Isizalwne seZimbabwe unkosazana Simanga Moyo ubemanyene lezizalwane zakweleSouth Africa bependa isikolo lokulungisa okunye okonakeleyo esabelweni seMpumalanga.

Uthi okwenze waphatheka kuloluhlelo lezinye ahlala ezenza minyaka yonke yikuthi wakhangwa yimpilo uMandela ayichitha esiza abanye abantu.

Esinye isizalwane seZimbabwe umnumnzana Junior Ndlovu, laye ubephatheke enhlelweni ezinengi zokusiza umphakathi. Yenake lezizalwane zakweleSouth Africa bethekelele abantu abahlala emikhukhwini abangabayanga bebapha izitofu zokupheka, ukudla lezinye impahla abazidingayo empilweni.

Umnumnzana Ngqabutho Mabhena uthi ngemva kokwenza imisebenzi etshiyeneyo eminyakeni edluleyo lonyaka ukhethe ukwenza okuhlukileyo.

Uthi lonyaka ukhethe ukusebenzisa isikhathi sakhe ecebisa izizalwane zeZimbabwe ngakho konke ezikudingayo enhlalweni yazo kweleSouth Africa.

UMabhena uthi loba okunengi okwenziwe nguMandela ekwenzele iSouth Africa, uyisibonelo esihle emhlabeni jikelele okudingeka silandelwe yiloba ngubani oqakathekisa izifiso zikazulu esilandele.Uthi njalo lenkokheli zeZimbabwe kunengi okufuze zikufunde kuMandela.

Inengike lithi ukuphatheka kwabo enhlelweni zomphakathi kwemukelwe kakhulu yizizalwane zakweleSouth Africa njengoba kukhombise ukuthi kabazanga kuleli ukuzobaminya kuphela kodwa babambisana labo enhlelweni zokuthuthukisa ilizwe lozulu wakweleSouth Africa.

XS
SM
MD
LG