Ingcwethi ezisebenza lozulu ukumsiza ukuthoba amanxeba awenqondo lenhliziyo lapho ethe wehlelwa yinkinga empilweni, ama Clinical Psychologis abangamalunga enhlanganiso ye Zimbabwe Psychologists Association sebesungule uhlelo lokusebenza bengahlawulwa lokusiza abazali, ababalisi kanye lezifundi ze St Luwanga Secondary School ngemva kwengozi elethwe lizulu lesiphepho ele Cyclone Idai.
Loluhlelo lusungulwe ngoMgqibelo odluleyo esikolo sabokholo lwe Roman Catholic i Dominican Convent Girls High e Harare.
Lubikwa lukhangelelwe ukuthatha inyanga ezedlula eziyisithupha kusiya ngokuthi umuntu ngamunye uthinteke kanjani ngezehlakalo azibonayo kulengozi.
Omunye walezingcwethi unkosikazi Sikholiwe Eunice Sibanda ulandisa ngokubenze basungule uhlelo lolu.
"Ukubuya kwethu la sibuye nje singabantu be ZPA ukuthi sibone ukuthi singancedisana ngaphi lamaParents Labantwana. Njengoba abantwana beyibo ababekhona kodwa abazali labo yibo abalabantwana. Kubuhlungu ebazalini ukuthi abanwababo bangenana lento enje labo balama reactions abawezwayo because of what happened khonale. So silapha ukuthi sibaphe I support.
Unkosikazi Sibanda uthi kuqakathekile ukuba balutholiswe lolusizo abehlelwa ludubo ikakhulu abantwana besikolo.
“Okwakhathesi ngilabanye bami abasuka ku Crisis Support Centre ababhizi Labantwana sikhuluma kanje. Kodwa akwenzi ukuthi ngikhulume ukuthi kuyini esikutholileyo ebantwaneni njengoba abantwana belama Rights abo e confidentiality yabo.”
Omunye wabathakazelela loluhlelo ngumbalisi omkhulu kulesi sikolo ofundisa izifundo ze Accounts esikolo se St Charles Luwanga Secondary school umnumzana Lenon Chizaza.
“Okwasenza saba lesibindi yikuba khona kwethu ngesikhathi lingozi isenzakala lokwanelisa ukusilisa oyedwa walabo bantwana kwasipha ukujabula lanxa saba lokudana lapho sesinanzelele ukuba sesilabathathu abalahlekelwe yimiphefumulo. Osekukhona kithi yikuba sikhangele sisiya phambili sicabange ngalokho esesithe sakwenza ukusiza izifundi. Lizokhumbula ukuba lesi sikolo kungesi lesiyana esikusibanga saphezulu kodwa singakhangela imizamo esithe yenziwa ngababalisi kusukela ku Form One kusiya ku Form Four sizathola ukuba besesiphakeme lesi sikolo.
Uthi uzimisele ukuphindela esikolo uchizaza aqhubeke ngomsebenzi wakhe wokuthuthukisa izifundi ngendlela ezehlukeneyo.
“Yinto esengicabange kakhulu ngayo hatshi ngoba ngingomele azwelwe usizi kodwa njengomuntu othe wasiza ngendlela ethize ukubonisa abafana laba ukuthi okwenzakala kibo yinto elakho ukwehlela yiloba ngubani empilweni kuyenzakala sikhathi sonke. Kungakho ngizimisele ukuphindela kulesi sikolo ngiyefundisa izifundo ze Accounts engizithanda okwamagama ngisize abafana bami ukuba baphumelele kumihloliso yabo.
Esinye isakhamuzi edolobheni le Harare umnumzana Collin Ncube uthi kungumbono omuhle lowo ukuba basizwe labo abawelwa yiloludubo olwalethwa lizulu elilesiphepho le Cyclone Idai.
“Mina ngibona ingani kuzabancedisa to a certain extent ngoba kungabahlupha kakhulu even lanxa sebefunda lanxa sebekhuluma sebebodwa ngoba I trauma yakhona asazi ukuthi aszi ukuthi bazokuyikhangela njani kodwa kungaba kungumqondo omuhle nje ukuthi basizwe. Kungabasiza kakhulu ukuthi basizwe ku counselling but angiboni ukuthi I memory yakhona ingahle iphele nje khonapho babuyele esikolo ngokuphangisa”.
Uvumelana lomcabango wabantwana laba ukuba basiwe kwezinye izikolo hatshi lapho babona khona lingozi isenzakala lapho okwabhubha khona abanye babo.
“Ye bengabantwana benjeyana, bayabe befisa ukuthi baye kwenye indawo engayisiyo lapho ababona khona abanye babo besifa, ababona abanye babo bethwala nzima belala ngendlala. Noma ngibona ingani loba ngemva kwe counselling nxa bebuyela endaweni yona leyana, ama memories lawana angaphenduka njalo”
Abantwana kunye lababalisi besikolo se St Charles Luwangwa e Chimanimani babona mathupha, abanye babo belahlekelwa yimiphefumulo ngemva kokuqgitshelwa lidwala lodaka oluvele entabeni ebibucwadlana.
Abaqhuba lumsebenzi bathi uzasabalaliswa ufinyelele lozulu wesiqinti se Chimanimani beqale ngababalisi labazali abalabantwana abafunda kulesi sikolo se St Charles Luwanga Secondary School sona ebesilezifundi ezifika phose amakhulu amathathu kuhlanganiswa labafunda bevelela emakhaya.
