Abogatsha lwezemfundo yePrimary le Secondary baphawule okusemthethweni uhlelo lokuhlatshwa kwabakumsebenzi wezemfundo, ijekiseni lokuzivikela kuCOVID-19 ele Vaccine.
Lokhu kwaziswe ngobona ngokukhulumisana lozulu kulolugatsha, umnumzana Taungana Ndoro ongathandanga ukuthatshwa amazwi.
UNdoro uthi loluhlelo lukhokhelwe ngunobhala wogatsha lwezemfundo yePrimary le Secondary, uPermanent Secretary Tumisang Thabela esibhedlela seWilkins Hospital, eHarare ohle wathatha lelithuba ukuhlatshwa yena lezinye iziphathamandla zogatsha lwakhe.
Lokhu kwenzakala ngemva kokuba uhulumende esanda kwemukela isipho samajekiseni okuzivikela kuCOVID - 19 wohlobo lwe Covaxin afike elizweni ngoMvulo evela kwele India.
Esemukela lesi sipho enkundleni yendizamtshina eye RG Mugabe International Airport, uMongameli Emmerson Mnangagwa uvele watsho ukuba ngamanye azasetshenziswa esigabeni sesibili sabahlatshwa lelijekiseni abagoqela abezomvikela, abafundisa emakolitshini lazo izifundi kanye lababalisi bemfundo yePrimary leSecondary.
“Ilizwe lisungule ihlandla lesibili kuviki ephelileyo, lokuhlatshwa kwabantu ijekiseni elivikela kumkhuhlane weCOVID - 19, lapho kuzohlatshwa khona ababalisi, abezomvikela, abakuhlangothi lwezemithetho, abafundisi, asebekhulile, abagula imikhuhlane engelaphekiyo.”
Okulinyathelo elinconywe kakhulu zingcwethi ezimbalwa kwezempilakahle ezigoqela uSikhwicamfundo Elopy Sibanda, umqondisi wenkampany ye Gamma Laboratories.
“Luhlelo olulungileyo kakhulu njalo sibona ukuthi luzanceda ukuthi abantu baduduzeke, bakwazi ukuthi hayi, umntwana usesikolo kodwa esikolo lapha akula mkhuhlane okhona.”
Bezikhona iziphathamandla zenhlanganiso ezimela ababalisi elizweni okubalisela eyeZimbabwe Teachers Association - ZIMTA ekhokhelwa nguDr Sifiso Ndlovu.
UNdlovu uncome umzekeliso kanobhala egatsheni lwezemfundo yePrimary le Secondary unkosikazi Thabela, ukukhokhela kuloluhlelo lokuhlatshwa lijekiseni evikela kumkhuhlane weCOVID - 19.
“Kanti lami ngizuze ithuba lokuthi ngihlatshwe iCOVID-19 Vaccine le, yona eSinopharm Vaccine. Ngokwenza njalo ke, ngithemba ubesitshengisela ukuthi akulanto okumele siyesabe ngeVACCINE le, kasizameni ukuthi ababalisi bavikeleke lokuthi njalo abantwabethu bavikeleke. Lokhuyana bekuyi kusikhuthaza, sonke silokhe sikhuthaza abantu ukuthi bangathandabuzi bahambe ngoba akusiyonto eyingozi. Okwamanje, ikhangeleka iyinto ezavikela uzulu wonke nje jikelele.”
Abenhlanganiso elwela amalungelo ababalisi bemaphandleni yeAmalgamated Rural Teachers Union of Zimbabwe - ARTUZ bathi lanxa beyincoma imizamo kahulumende yokwenqabela ukumemetheka kweCOVID - 19 kunengi abasakhala ngakho.
Okufakazwa yisiphathamandla seARTUZ, umnumzana Wilfred Nyathi.
“Uhulumende kakayenzi amalungiselelo afunakalayo ukuthi abantwana lababalisi labo bonke abasebenza ezikolo, bebe safe. Njalo thina njengababalisi silezikhalazo ezemali.”
