amalinks wokungena

Abokholo Lwesi Khristu Bathi Uzulu Kumele Aphatheke Kukhetho Oluzayo

  • Mavis Gama

UMfundisi Ancellimo Magaya labanye bakhe akade bese Media Center eHarare.

Abenhlanganiso yeZimbabwe Devine Destiny (ZDD), sebephawule umkhankaso we ‘CHRISTIAN VOTE CAMPAIGN’, ngenjongo yokukhuthaza abokholo lwesiKhristu ukuba baye kukhetho belandela okutshiwo nguNkulunkulu.

Inhlanganiso le ithi lokhu kuzakwenza ukuba bakhethe inkokheli ezilandela izimiso zikaNkulunkulu ngesikhathi kulungiselelwa ukhetho luka 2018.

Ekhuluma lentathelizindaba eMedia Centre eHarare ngoLwesine, umqondisi wenhlanganiso yeZDD, uBishop Ancelimo Magaya, uthe bakubone kufanele ukuba baqhube lumkhankaso oqondana labokholo lwesiKhristu, ukuba bazwisise ukuqakatheka kokuphatheka kwabo kukhetho, lokukhetha inkokheli uqobo.

Uxwayise abezombusazwe ukuba behlukane lemikhuba emibi nxa bekhankasela ukhetho, babe ngabantu abesaba uNkulunkulu lalapho uzulu esebangenise embusweni.

​Umfundisi Christopher Nkomo we Bretheren-In-Christ Church koBulawayo, okumanyano we ZDD, uthe kungumsebenzi kazulu ukuphatheka kukhetho.

UMfundisi Christopher Nkomo webandla lokholo lwesiKhristu olwe Brethren-In-Christ Church.
UMfundisi Christopher Nkomo webandla lokholo lwesiKhristu olwe Brethren-In-Christ Church.

​Abe ZDD bathi akusiqiniso okuhlezi kukhankaselwa ngeyinye yenkokheli yezombusazwe ethi abokholo lwesiKhristu akumelanga bangene kwezombusazwe.

Bathi umbhalo ngokwawo, umumethe indaba ezinengi ezitsho phezu kwehlandla abamabandla okholo alalo, ekukhetheni lekususeni inkokheli, kulandelwa izimiso zikaNkulunkulu.

Uthe abokholo lwesiKhristu kumele bazi ukuqakatheka kokuphatheka kokhetho ngoba kuyiyona ndlela engenisa lokuphumisa inkokheli zombusazwe ebukhosini.

Abanye abafundisi asebeke bakhuza abezombusazwe babalisa umfundisi Patrick Mugadza we Remnant Church kanye lo Mfundisi Evan Mawarire womkhankaso owe #This Flag Campaign.

Ababili laba bacine bevalelwa entilongweni ngoba bebonise inkokheli ka Mongameli Robert Mugabe le Zanu PF, lapho ephambuka khona kundlela zikaNkulunkulu ekubuseni.

Facebook Forum

XS
SM
MD
LG