amalinks wokungena

Abasebenza Bengekho Emakhaya Besatshelwa Ukuba Engozini Yokuthola Igciwane leHIV

  • Mavis Gama

Izimotha ezithwala impahla

Inhlanganiso eziphatheke emikhankankasweni yokulwisana lokuvimba ukusabalala kwegciwane lengculaza zithi nxa kungasaphunywanga lenhlelo zohlobo olukhanga labo abasemisebenzini ebenza bahambe kakhulu, ayiyikunqotshwa limpi yegcikwane le HIV.

Abakuloluhlangothi bagoqela abatshayela imota ezithwala impahla, abaphila ngokuthengisa impahla abayithenga kwamanye amazwe kanye labomakorokoza.

Lapho okuIezimota ezinkulu ezithwala impahla ziphuma lokungena, abatshayeli belindele ukuba zilayitshwe amatshe ohlobo lwe Chrome, emgodini we Mimosa Chrome Mine, esiwa emazweni angomakhelwane kuyisiphithiphithi ngabathengisa imizimba.

Abe Midlands Aids Organisation ( MACO ) eZvishavane, bebambisana labe OXFAM bathi kuqakathekile ukuphuma lenhlelo zokutholisa ulwazi abakulolu hlangothi ngendlela zokuzivikela lapho besiya emacansini.

Baithi sebenanzelele ingozi ekhona ekubatshiyeni ngaphandle, emikhankasweni yokulwisana lokusabalala kwegciwane lengculaza.

Indawo ezinjenge Mimosa Mine eZvishavane abatshayeli bacina bechitha isikhathi eside esingaba ngamaviki amabili loba amathathu belindele ukuba imota zabo zilayitshwe yikho okuphetha sekubangenisa kuzilingo kwezokuya emacansini.

Umsekeli womqondisi wenhlanganiso yeMACO, uMnu. Kudakwashe Gumbo uthi lesi ngesinye sezikhenxe ezikhona lapho kuqhutshwa inhlelo zokutholisa uzulu indlela angazivikela ngazo emikhuhlaneni ethelelanwa emacansini.

Uthi bakubone kufanele ukuphuma lenhlelo eziqondana lalolu hlangothi.

Abe MACO bathi ukuchitha isikhathi eside kwabatshayeli bekulendawo yikho okubenza bacine sebelingeka kwezemacansini. Kuphinde kwengezelelwe yikuthi amankampani abawasebenzelayo, ababavumeli ukuhamba labomkabo ngendlela yokuzivikela ezilingweni.

Abatshayeli abakhulumisane le Studio Seven bathi bayayizwisisa ingozi yokuya emacansini bengazivikelanga kodwa okusilelayo kululwazi olwaneleyo.

Umnumzana Ntokozo Ngwenya uleminyaka engamatshumi amathathu lasithupha-36 yokuzalwa. UNgwenya usesanelisa iminyaka eyisitshiyalombili engumtshayeli wezimota ezithwala impahla.

UNgwenya uthi ulwazi lemfundiso luqakathekile ngemva kokuvulwa amehlo ukuba engomunye walabo obikwa esengozini enkulu yokuthelelwa leligciwane le HIV lemikhuhlane yengulamakwa ngoba bechitha isikhathi eside besemigwaqweni.

Umnumzana Canaan Mkhwananzi, ongumtshayeli laye, uthi ulolwazi olulutshwana ngendlela zokuzivikela. Uthi ufisa ngabe uyalutholiswa ulwazi olwaneleyo azwisise ngokugcweleyo ngokusetshenziswa kwe condom ngendlela eyiyo.

UMkhwananzi uthi usezakwenelisa ukwabelana ulwazi labanye njengaye kanye labomndeni ngemva kwalolo aluchathekelwe ngabe MACO eZvishavane.

Unkosikazi Sithembinkosi Nyathi waseZvishavane useleminyaka emihlanu ephila ngokuthengisa impahla ayithenga emazweni abalisa iSouth Africa, Mozambique le Zambia. Yenake uthi kuqakathekile ukuba umuntu azivikele kumikhuhlane ethelelanwa emacansini okubalisa igciwane le HIV le ngculaza sikhathi sonke.

Ingcwethi kwezempilakahle kanye lenhlanganiso eziphatheke emikhankasweni yokulwisana lokusabalala kwegciwane, bathi kumqoka ukuba luhlelelwe inhlelo zohlobo lwaphezulu loluhlangothi lwabasebenza bengayi emakhaya sikhathi sonke, ukuze zifezeke iziqondiso zelizwe zokuqeda udubo lwengculaza ngomnyaka ka 2030.

Facebook Forum

XS
SM
MD
LG