amalinks wokungena

Breaking News

Adliwa Kabuhlungu Amaqembu eZimbabwe Emidlalweni Etshiyeneyo


Adlale okuyangisayo abaqembu eZimbabwe agoqela eleWarriors.

Akhe phansi amaqembu amela ilizwe leZimbabwe kumdlalo we rugby kanye laku mdlalo wenguqu njengoba enqotshwe kumidlalo abephatheke kuyo ngempelaviki edluleyo.

Asekhithike njengamazolo amathuba okuba iqembu elimela ilizwe kumdlalo we rugby liphakamise inkezo ye Rugby Africa Gold Cup ngemva kokunqotshwa nge 41 ka 22 elikwenziwe liqembu le Kenya ngoMgqibelo emdlalweni oqhutshelwe enkundleni ye Hartsfield edolobheni lako Bulawayo.

Limpumela itsho ukuba iqembu le Zimbabwe selinqotshwe kabili kumncintiswano walonyaka njengoba ensukwini ezedluleyo linqotshwe ngele Namibia njalo umqeqetshi walo uCyprian Mandenge uthi kuzamele balungisise amaphutha abo ukuze bengagunyulwa kusibaya sika Group 1A okuyilapho okuvela khona iqembu elithi linganqoba amanye liyephatheka kumidlalo yezizwe zomhlaba.

Akhe phansi ngenkamanzi amaqembu eZimbabwe emdlalweni etshiyeneyo.
Akhe phansi ngenkamanzi amaqembu eZimbabwe emdlalweni etshiyeneyo.

“Bekumele sidlale njengokulungiselela kwethu, ngemuva sidlale ichop tackle ngoba abadlali beKenya bebebakhulu kulathi. Kumele sense izinto ezincane kakuhle ngoba kuqakathekile khonokho. Osekusele yikuba silwise ukuhlala sikusubaya sika Group 1A.”

Iqembu le Zimbabwe lizadlala lele Tunisia kanye lele Uganda kumidlalo emibili elisele layo kumncintiswano walonyaka.

Kolunye udaba oluhambelana lalolu, iqembu elimela isizwe emdlalweni wenguqu liphelelwe ngumphako kumkhankaso wokudinga amaqembu azaphatheka kumcintiswano weCHAN ozaqhutshelwa elizweni le Kenya ngomnyaka ozayo ngemva kokunqotshwa ngele Namibia ngeSonto emdlalweni oqhutshelwe esigodlweni iHarare enkundleni ye National Sports.

Iqembu le Zimbabwe lizithole lingutshiki lobhanqa 1 ka 1 leqembu le Namibia ngemva kokuba lona linqobe nge 1 ka nya lidlala lingekhaya ikanti ele Namibia lalo lanqoba nge 1 ka nya emdlalweni wakuqala okudale ukuba kucine kutshaywa imbekwa ukuze kutholakala iqembu elizadlulela phambili kwathi ke ele Namibia laselinqoba nge 5 ka 4.

Umgadli ohlohle igoli leqembu le Zimbabwe kungakatshaywa imbekwa uPrince Dube uthi ukwehluleka ukuzidalela amathuba okuhlohla kulahlise kakhulu iqembu lama Warriors.

“Sehluleke ukuba sikhande amathuba amanengi kodwa njengeqembu sidlale kuhle inkinga nje sisuke sasesidliwa sidlala singekhaya kodwa hayi sizabona ukuthi kuzahamba njani emidlalweni eminye.”

Obukele umdlalo lo kumabonakude uRangariro Mutero uthi kumele inkokheli zomdlalo wenguqu kwele Zimbabwe zibe zifunde isifundo esokuba kumele imidlalo ilungiselelwe ngemfanelo.

“Abe Namibia basikhulele ngebhola njalo bebegijima bekhanya bona beqinile kulathi yikho ke kwelakusasa kuzamele lathi silungiselele ngemfanelo sithole isikhathi ukuze abadlali bethu bejwayelane.”

Umncintiswano weCHAN uzaqhutshelwa elizweni le Kenya ngomnyaka ozayo njalo kuzakuba ngokwakuqala ukuba ilizwe le Zimbabwe lingaphatheki kiwo selokhu wasungulwayo.

Kusenjalo iqembu lamajaha aleminyaka engaphansi kwelitshumi lesikhombisa elimela ilizwe kumncintiswano wenguqu oqoqwe yinhlanganiso yeCosafa kwele Mauritius libhaxabulwe nge 5 ka nya ngele Malawi emdlalweni walo wesibili kulumncintiswano odlalwe namhla emini.

Limpumela iza ngemva kokuba leliqembu eliqeqetshwa nguMoses Chunga litshaywe nge 3 ka nya ngele Mauritius emdlalweni walo wakuqala.

Facebook Forum

XS
SM
MD
LG