Kuhlelo lapho esikhangela okwenziwa yizizalwane zeZimbabwe esezihlala kwamanye amazwe, kuliviki, sikhangela okwenziwa ngamakholwa esiKrestu asehlala eMelika.
AmaZimbabwe asehlala eMelika ababumba inhlanganiso eye Christian Fellowship International – CFI, balomhlangano wabo abawenza kanye ngomnyaka, bewenzela ezigabeni ezitshiyeneyo zalelozwe, ngokuzobhisana.
Owalonyaka umhlangano wenzelwa edolobheni ele Atlanta esigabeni eseGeorgia, kusukela ngoLwesihlanu mhla ka30 Ncwabakazi uphela ngeSonto mhla ka1 Mpandula, 2019.
Abaqoqe umhlangano walonyaka abesigabeni eseGeorgia, uMufundisi Japhat Ndemera okhokhela inbandla lenkonzo ele Pilgrims Community Church, engomunye njalo wabasungula linhlanganiso eyeCFI, uthi akubizwa ozwayo lonyaka eAtlanta ngoba abeza emhlanganweni bazathola ukudla kwendlebe, ukusindiswa lokuqiniswa ngentshumayelo langemithandazo.
"Kulabafundisi abambalwa abakhonapha eMelika labavela kwele Canada, eZimbabwe laseSouth Africa, abagoqela umculi olodumo uMfundisi Toggy Chivaviro odume ngengoma yakhe ethi ‘Ebenezer’ ovela kweleSouth Africa.
UMfundisi Ndemera uchasise kabanzi ngomhlangano wabo walonyaka kungxoxo ayenze loPraxedes Jeremiah oweStudio 7.
"Injongo yokusungula linhlanganiso yayingeyokuthi sihlangane njengamaZimbabwe siqinisana lokucebisana njengemuli njengoba sikhatshana lekhaya, akusela obabakazi abalaya abantwana ngakhoke sakubona kufanele ukuthi sime endaweni yabogogo labokhulu, ukulaya abantwana kanye nje lokulondoloza ukuthandaza langokucula ngokwesiko lethu."
