amalinks wokungena

Breaking News

Akubunjwe Uhulumende Womanyano eLibya - Mugabe


UMongameli Mugabe uthi abagenqule umbuso kaMuammar Ghadaffi eLibya ngenyanga edluleyo kumele bakhulumisane labasekeli bakhe kubunjwe uhulumende womanyano kulelolizwe.

Ekhuluma lentathelizindaba eHarare ngeSonto uMugabe usole amazwe eAfrica asenanze uhulumende weNational Transitional Council esithi angabathengisi.

Uhulumende weZimbabwe uxotshe obengummeli weLibya eHarare ngenyanga edluleyo ngemva kokuba ephumele egcekeni ukuthi usekela abahlamuki.

IAfrican Union yona iveze ngeviki edluleyo ukuba sinanza uhulumende weLibya. EleSouth Africa lalo lithethe inyathelo elifanayo.

Inkulumo kaMugabe ibikhanya isithi lanxa iAU isinanza uhulumende lo, iZimbabwe ayisoze ikwenze lokhu nxa uhulumende omutsha enganikanga abasekeli bakaGhadaffi izikhundla.

Isikhulumeli seZanu PF uMnu Rugare Gumbo uthi ibandla lakhe lisekela uMugabe ekuthini kumele kubunjwe uhulumende womanyano eLibya.

Kodwa isikhulumeli seMDC ekhokhelwa nguMnu Welshman Ncube uMnu Nhlanhla Dube, uthi kusobala ukuthi injongo kaMugabe ngeyokuvikela uGhadaffi.

XS
SM
MD
LG