Lanxa uMongameli Emmerson Mnangagwa ethembise ukuvuselela umnotho welizwe ngokuphangisa ekungeneni kwakhe embusweni nyakenye, akulalutho olubambekayo aselwenzile nanku imali iqhubeka isilela lemisebenzi ingatholakali, kutsho ingcwethi.
UMnangagwa uke waba semhlanganweni weWorld Economic Forum eSwitzerland ngenyanga edluleyo waphenduka esithi osomabhizimusi bakwamanye amazwe bamthembise ukuthi bazoza eZimbabwe ukuzevula amabhizimusi bathuthukise umnotho.
Kodwa ingcwethi zithi akula mankampani asibuyile eZimbabwe. Zithi njalo isibonelo esikhulu sokubhidlika komnotho lokwehluleka kukaMnangagwa yintengo yezinto eqhubeka iqonga mahlayana ezitolo.
Ukuze eleZimbabwe lenelise ukuvuselela umnotho walo kumele lithole imali enengi engena kumabhiliyoni lamabhiliyoni amadola.
Kodwa khathesi kunzima ukuthi itholakale leyomali ngoba ilizwe kalenelisi ukuboleka imali kunhlanganiso zomhlaba ezigoqela iInternational Monetary Fund leWorld Bank ngoba lizikweleda.
I-IMF ikhangelelwe ukuthumela iqula layo eZimbabwe kumalanga azayo ukuyaphathisa uhulumende ukuhlela indlela angavuselela ngazo umnotho.
Usibalukhulu webhanga elikhulu lelizwe uMnu John Mangudya lomphathathintambo wezemali uMnu Patrick Chinamasa bona bakhangelelwe ukuphatheka emihlangano yeIMF kweleMelika ngenyanga ezayo.
Ingcwethi kwezenotho uMnu Masimba Kuchera uthi sokusegcekeni ukuthi uMnangagwa akalawo amaqhinga okuvusa umnotho, wona osulesikhathi uguqe ngamadolo.
