amalinks wokungena

Breaking News

'Akumelanga Amapholisa Abophe Abafundisi Abalwela Uzulu eZimbabwe'


UMfundisi Evan Mawarire

Ezinye izizalwane zeZimbabwe kweleSouth Africa sezixwayise uhulumende weZimbabwe ukuthi ayekele umkhuba wokubopha abafundisi abakhuluma iqiniso ngokubi okwenzakala elizweni.

AbeZimbabwe laba bathi isenzo sikahulumende lesi silakho ukuletha isiqalekiso kubabusi laselizweni jikelele.

Bazonde baganunwabo abeZimbabwe abakweleSouth Africa ngokubotshwa kwabafundisi abasola ububi obenziwa nguhulumende kaMongameli Mugabe.

Lokhu kulandela ukubotshwa kukamfundisi Evan Mawarire, othe ngokusola indlela uhulumende abusa ngayo wabotshwa, kwabalemizamo yokumthumba, wabaleka elizweni, kwathi ekuphendukeni kwakhwe ngeviki ephelileyo wabotshwa esesetheswa amacala okuzibazela.

Umfundisi Mawarise ubotshwanje kusanda kubotshwa okwesibili umfundisi Philip Mugadza owe Remnant Pentecostal Church laye osekhulume kanengi exwayisa uhulumende ukuthi ekele ukuhlukumeza uzulu.

Inengi lithi lisekela abafundisi laba ngoba lisithi imbali yebhayibhili ikhombisa ukuthi uNkulunkulu wayethumela abaphorofethi ukuyatshela amakhosi ngokungalunganga abakwenzayo. Amakhosi abengazilaleli lezi zixwayiso abejeziswa kakhulu.

Isizalwane seZimbabwe umnumnzana Never Sibanda uthi uhulumende akekele ukuzokhela amalahle ekhanda ngokuhlukumeza abafundisi.

“Kuyabonakala phela ukuthi ilizwe alikhululekanga ngoba umfundisi ukhuluma into ze church but ngokuhlupheka kwabantu aze kungathi usengeniswe ku politics engeniswa ngabantu ngohlupho ayabe elukhangele, ngoba umfundisi ukhokhela abantu abathuleyo abalepeace futhi. Ungena njani umfundisi ejele? Lihlazo!”

Ngakolunye uhlangothi unkosazana Silibaziso Ncube uthi ukubotshwa kwabafundisi lokhu ngeke kutshintshe usekelo lwabantu ngensolo abazethulayo.

“Abafundisi bakhuluma iqiniso ngoba iZimbabwe nje iwile. Khona manje abantu abanamisebenzi, bagcwele emazweni ngendaba zokuswela imisebenzi nxa abafundisi sebekhuluma iqiniso sebebotshwa bebotshelwa iqiniso.”

UMnu. Sibanda yena uthi kunengi uhulumende okufuze akufunde ebhayibhilini mayelana lababusi abebehlukumeza abaphorofethi abebexwayisa ngendlela ezimbi zokubusa.

Uthi lobanje uhulumende engabakhulela abamabandla aphikisayo labafundisi, manengi amakhosi athi ngemva kokuhlukumeza ababethunywe kubo, umbuso wabaphelela njengamazolo.

UNkosazana Ncube uxwayisa uhulumende ngokuthi akhulule abafundisi ngoba bengelacala. Uthi kumele kube yibo ababusi abazinuka amakhwapha.

“Naye uhulumende waseZimbabwe ake azame ukutshintsha. Ake azame ukwenza into ezilengqondo. Azame ukuthi alungisele abantu ilizwe ukuthi abantu bahlale kahle. Bangabi behamba emazweni abanye abantu kukanti ilizwe leZimbabwe liswelenje umuntu olilungisayo.”

Okwakhathesi umfundisi Mawarire osejele ukhangelelwe ukubuyela emthethwandaba emavikini amabili azayo lapho amagqwetha akhe ekhengelelwe ukutshela umthethwandaba ukuthi inqwaba yamacala asewetheswa ngamanga aluhlaza avela emapholiseni.

Facebook Forum

XS
SM
MD
LG