Amafutha ezimota asesilela edolobheni leGwanda osekudale ukuthi atholakale emkambo womkoto.
Inengi labatshayela imitshova bathi sebewathola ngentengo ephezulu kakhulu ethengiswa ngabantu asebezama impilo hatshi amagalaji.
Bekungela ngitsho lethonsi lamafutha ezimota emagalajini abalisa ele Engen eleZuva kanye lele Redan kuthi koGlow bebelamafutha epethulo kodwa befuna imali phambili bengayamukeli amakhadi emabhanga okuswiper.
Ukuswelakala kwamafutha ezimota lokhu kuza ngesikhathi ilizwe libhekane lokungahlaliseki kwezomnotho osekudale ukuthi uzulu aphaphatheke ethenga ukudla ngobunengi egcina ezindlini.
UMnu. Terrance Nkomo, umtshayeli wamathekisi, uthi ukusilela kwamafutha ezimota lokhu kubisela muva ibhizimusi lakhe.
"Loludaba alusiphathanga kahle sibili … Uyatshona ubhoda imini yonke khonalapha udinga ukuthi uthole ifuel sokumele uye kublack market (lapho ethengwa khona) $8 kumbe $9. Akulamali uyayithatha nga ucalculator lemali yamapholisa khonala iyavela nga yikubuyela ungela even isinkwa endlini kuthwe usebenzani manje"
Amagalaji alamafutha ezimota sefuna abezimota babhadale ngemali hatshi ngamakhadi ebhanga osekulethe ubunzima kuzulu ovele ebhekane lokudubo lokuthola imali emabhanga.
UMnnu. Melusi Sibanda uthi kuyamangalisa ukuthi abamagalaji abasayamukeli amakhadi ebhanga.
“Nanku phela kuthwa siwathande amakhadi eplastic money amagalaji njengaleli esikilo khathesi bayala ukuthi sisebenzise amakhadi ukuze sithole amafutha ezimota so uhulumende asikwazi ukuthi nxa esithi amakhadi asebenze ukuswiper ngapha abathengisa ipetrol ledeisel besala ukuthi sokumele senze njani"
Ukusilela kwamafutha ezimota lokhu sokudale ukuthi athengiswe nsitha lapho intengo yayo ehlezi ikhwelile.
Kusenjalo, labo abaphila ngokuthenga lokuthengisa imali yakwamanye amazwe ezitaladeni ababizwa ngokuthi ngosiphatheleni, labo sebeyehlise amandla emali yohlobo lwebond note kuqathaniswa ledola leMelika osekudale ubunzima kulabo abathenga impahla kwele South Africa bezothengisa ezimbabwe.
Ibond elilodwa libiza amaRand angu 8 kuthi idola leMelika lona libiza alitshumi lantathu - R13.
UNkosazana Judith Ndlovu ngomunye walabo abathenga impahla kwele South Africa bezothengisa kuleli.
"Ukusetshenziswa kwebond note sekusilimaza kakhulu thina esithenga izinto zebhizimusi ngaphandle kwelizwe njengakhathesi ungahamba le 10 bond bayakunika iR80 kodwa umuntu ole $10 bayamnika iR130 osekwenza kubenzima ukuthi nxa wena uthengisela abantu ngeforeign currency ukwenza njani …”
UMongameli Robert Mugabe uthi ukusilela kwamafutha ezimota lokhu kanye lokunga zinzi kwezomnotho kubangelwa yizitha zakhe ezifuna ukumugenqula embusweni