Inkokheli yabalwa impi yenkululeko, amawar vets, ithi sekuyisikhathi sokuthi umongameli Robert Mugabe asuke esihlalweni njalo bayasekela umkhokheli wabo, uMnu. Christopher Mutsvangwa owaxotshwa kubandla le Zanu PF.
Ibithukuthele inkokheli yeZimbabwe National Liberation War Veterans Association, ngesikhathi ingena umhlangano wokubonisana okungenziwa ukulungisisa isimo kubandla elibusayo lakuhulumende, bethi balelungelo lokutsho umbono wabo. Lumhlangano wenzelwe e Raylton Club e Harare.
Ama war vets athi umongameli Mugabe sehlulekile ukukhokhela sekumele adedele emuva atshiyele isikhundla umsekeli wakhe, uMnu. Emmerson Mnangagwa.
"Sihlezi sibona kusiba lokuthwaliswanzima kwabalemibono ehlukene leyakhe abantu bebotshwa abanye besetheswa amacala angazakaliyo ukuthi avela ngaphi," kutsho abalwa impi yenkululeko laba.
Bengezelele besithi kabasoze basekele uMongameli Mugabe nxa engancintisa kukhetho lokudinga umongameli ngomnyaka ka 2018.
Bathi sesifikile isikhathi sokuphumela ababusayo egcekeni, ulungisiswe umonakalo wezomnotho, luqedwe udubo lokungathembeki lokukhethana ngemihlobo kanye lobunini. Bathi kabayi ndawo njengoba bengabanini bomhlangano we Zanu PF.
Bembe phansi bethi akekho olamandla okuxotsha uMutswangwa owasuswa kusikhundla sokuba ngumphathintambo wabalwa impi kanye lokulahlekelwa yisikhundla sakhe sokumela isigaba se Norton edale lephalamende. Bengezelele bethi ukuxotshwa kwakhe kufana lokubaxotsha labo kubandla leZanu PF.
Umnumzana Elphas Tshuma ungomunye wama lunga ekhomidi evela koBulawayo. Wembe phansi njengabanye bakhe ethi uMnu. Mutsvangwa uzakuqhubeka engumkhokheli wabo.
UTshuma wengeze ethi yena labanye bakhe sebekhathele ukube lokhe besebenzela inkokheli ebasebenzisayo ibalahle lapho isifuna.
UMnu. Zenzo Ncube waseMatebeleland North, ongomunye wabakhokheli bama war vet, ubegcwele ukutshiseka okukhulu phezu kwesiphatho abasitholayo lanxa kuyibo abalwa ukuletha uzibuse.
UNcube uthi uMutsvangwa akufelayo yikuba ubesevula amehlo abalwa impi njengaye ukuba bathole okuzabaphilisa ngokuphatheka kwezomnotho.
Ophethe uhlangothi lwezomvikela kunhlanganiso yama war vet, uMnu. Dennis Ndlovu usole ukuba kube lokhe kuthiwa kulekhefu lokuhlonipha amaqhawe bona empeleni bengahlonitshwa.
UNdlovu uthi okubazwisa ubuhlungu yikuba lindaba yokuhlukuluzwa kwabo ayiqalanga kathesi kodwa bekulokhu kuhlukuluzwa inkokheli yabo.
Lumhlangano ungenwe yinkokheli yabalwa impi yenkululeko evela kunxa zonke zelizwe ngenjongo yokuvunyelanwe kulokho okumele kwethulelwe inkokheli yelizwe.
Abalwa impi yenkululeko laba bathi sesifikile isikhathi sokuba kulandelwe imithetho elukhuni ukujezisa abaphatheka kundaba zokungathembeki njengalokho okwenzakala kweleChina lamanye amazwe angempumalanga.
Okunye obekukhulunywa ngakho yimpumela yomhlangano owenziwa lomongameli Robert Mugabe ngenyanga ka Mabasa okulokhe kungakafezeki lalamuhlanje.
