amalinks wokungena

Breaking News

Amabandla Akhankasela Ukhetho Lokudinga Umlawuli weDale lePhalamende


Amabandla akuhulumende womanyano abalisa iZanu PF lamacele womabili eMDC seqalisile ukukhankasa edinga usekelo kumalunga edale lephalamende azavota kukhetho lokudinga umlawuli walelidale.

Idale lephalamende lisele lingasela mlawuli ngeviki edluleyo kulandela isinqumo seSupreme Court sokuthi obekulesi sikhundla engoweMDC ekhokhelwa nguMnu Morgan Tsvangirai uMnu Lovemore Moyo kakhethwanga ngemfanelo.

Ibandla leZanu PF libikwa lilakho ukukhetha uMnu Simon Khaya Moyo, ongumgcinisihlalo walo ukuba ancintise. IMDC kaTsvangirai ithi izabuyisela uMoyo kuthi iMDC ekhokhelwa nguMnu Welshman Ncube yona ilakho ukufaka uMnu Paul Themba Nyathi.

Kulandela ukususwa kwakhe esikhundleni lesi uMoyo, bakhona abathi kumele avunyelwe njalo ukuba ngumeli weMatobo edale lephalamende, okuyisikhundla asitshiye aze akhethwe ukuba ngumlawuli.

Kodwa abanye bathi umtetho awukuvumi lokho. Umabhalane wephalamende uMnu Austine Zvoma legqwetha elikhulu likahulumende uMnu Johannes Tomana babikwa bephakathi kokuhlafuna loludaba.

Ukucubungula loludaba uNtungamili Nkomo uxhume uMnu Brilliant Mhlanga ingcwethi ecubungula ezombusazwe yena othi kaboni uMoyo ebuyela kusikhundla sokuba ngusomlomo.

XS
SM
MD
LG