amalinks wokungena

Amabandla Ezombusazwe eZimbabwe Atshayela uNkosikazi Dlamini Zuma Ihlombe

  • Ntungamili Nkomo

Amacele womabili eMDC setshayele uNkosikazi Nkosazana Dlamini-Zuma ihlombe ngokukhethwa ukuba ngumgcinisihlalo weAfrican Union Commission ngeSonto emhlanganweni owenzelwe kweleEthiopia.

UNkosikazi Dlamini Zuma, ongumphathintambo wendaba zasekhaya eSouth Africa ubencintisana loMnu Jean Ping weleGabon onguye obephethe lesisikhundla kusukela ngo2008.

Iziphathamandla zikahulumende weSouth Africa zithi akukakhanyi ukuthi uDlamini Zuma uzatshiya isikhundla sokuba ngumphathintambo kumbe hatshi.

Inhlanganiso zabesifazana lazo zithi zijabule kakhulu ngokungena kwakhe kulesi sikhundla ngoba kungokwakuqala embalini yeAU ukuthi sithathwe ngowesifazana.

Unobhala jikelele weMDC ekhokhelwa nguMnu Welshman Ncube, uNkosikazi Priscillar Misihairambwi-Mushonga uthi lokhu kuveza ukuba izwekazi leAfrica lisendimeni eqondileyo kudaba lokulinganiswa kwamathuba phakathi kwabesilisa labesifazana.

Umbono lo ugcizelelwe yisikhulumeli salelibandla uMnu Nhlanhla Dube.

Isikhulumeli seMDC ekhokhelwa nguMnu Morgan Tsvangira, uMnu Douglas Mwonzora uthe ukukhethwa kukaNkosikazi Dlamini-Zuma kuzaphathisa kakhulu iAfrican Union ukuthi ithole imbiko eqondileyo ngodaba lweZimbabwe.

IStudio 7 kayenelisanga ukuzwa uhlangothi lweZanu PF ngoba isikhulumeli salelibandla uMnu Rugabe Gumbo ebengadobhi umakhalekhukhwini wakhe.

IStudio 7 iphinde yaxhuma ingcwethi kwezombusazwe uMnu Nkululeko Sibanda yena othe kaboni ukungena kukaDlamini Zuma kulesisikhundla kusiba lomthelela omkhulu kudaba lweZimbabwe.

XS
SM
MD
LG