amalinks wokungena

Breaking News

Amacele eMDC Akhuluma Ngabammeli Bawo


Trudy Stevenson
Amacele womabili aweMDC athi azavumela amalunga awo ukuqhubeka emela eleZimbabwe kwamanye amazwe nxa ethe aphiwa lelothuba nguMongameli Robert Mugabe.

Ugatsha lobudlelwano beZimbabwe lamanye amazwe womhlaba luphakathi kokususa abammeli beZimbabwe emazweni atshiyeneyo lubasa emazweni amatsha abanye bephenduke ekhaya umsebenzi usuphelile.

Umabhalane wogatsha olubona ngokudlelana kweZimbabwe lamanye amazwe uMnu Joey Bimha utshele iStudio 7 ukuthi inguquko le izaphatha isilinganiso sabammeli beZimbabwe kwamanye amazwe esifika kumatshumi ayisikhombisa lanhlanu, 75%.

UBimha uthi inguquko le izagoqela abammeli bonke nje kungelani lokuthi adlelana laliphi ibandla lezombusazwe.

Umsakazo weZBC ubika ukuthi phakathi kwabammeli bamacele eMDC abahlanu akhethwa phansi kukahulumende womanyano, kuzasala ababili kuphela.

Ababikwa bezaqhubeka besemsebenzini wabo laba ngomela ilizwe keleSenegal uNkosikazi Trudy Stevenson olilunga leMDC ekhokhelwa nguMnu Welshman Ncube lommeli weZimbabwe eSudan uNkosikazi Hilda Mafudze oweMDC-T.

Abazaphenduka ekhaya sebelahlekelwe yimisebenzi nguNkosikazi Jaqcueline Zwambila omela ilizwe kweleAustralia, uMnu Mabhedi Ngulane oseNigeria loMnu Hebson Makuvise oseGerman. Abathathu laba ngabeMDC-T.

UBimha kathandanga ukuveza ukuthi ngobani abazasala njalo ngobani abazabuyela ekhaya, esithi ugatsha lwakhe lusakukhangelisisa lokhu.

Isikhulumeli seMDC-T uMnu Douglas Mwonzora uthi kaboni okubi ngokuthi amalunga ebandla lakhe eqhubeke emela ilizwe phansi kukahulumende weZanu PF alubana ethe aphiwa lelothuba nguMugabe.

Amazwi la agcizelelwe yisikhulumeli seMDC kaNcube uMnu Nhlanhla Dube.
XS
SM
MD
LG