amalinks wokungena

'Amakholwa Kawabhalise Ukwenzela Ukuthi Avote Kukhetho Ngomnyaka Ozayo'


UMnu. Qhubani Moyo wenhlanganiso ye Zimbabwe Electoral Commission loMnu. Useni Sibanda wenhlanganiso yamakholwa eye Zimbabwe Christian Alliance' labanye abantu abangene umhlangano oqakathekileyo koBulawayo.

Abenhlanganiso yamakholwa esiKhristu eyeZimbabwe Christian Alliance (ZCA) ngoLwesibili babelomhlangano koBulawayo wokuhlaziya udaba lokhetho lomnyaka ozayo emizameni yokwehlisa udlakela ngesikhathi sokhetho lokukhuthaza abantu ukuba bayebhalisa ukuvota baphinde bavote.

Lokhu kuqoqwe ngokunanzelela ukuthi banengi abantu abakholwa isiKhristu eZimbabwe abalelungelo lokuvota njalo lamandla okukhanga abanye abantu ukuthi babhalise ukuvota.

IZimbabwe iphakathi kokulungiselela ukhetho lomnyaka ozayo kusetshenziswa indlela entsha yokubhalisa ukuvota okuthiwa yiBiometric Voter Registration.

Inhlanganiso ebona ngokuqhutshwa kokhetho elizweni eyeZimbabwe Electoral Commission isimelele imitshina ezasetshenziswa ukubhalisa ukuvota.

Umkhokheli webhodi yeZCA, uMfundisi Obert Shatai, uthi balungiselela ukuhlomisa abantu ukuba bayevota.

Okwamanje uthi bakhangelane lokukhankasa befundisa abantu ngobubi bokuphatheka kudlakela ngoba kuphambana lemilayo kaNkulunkulu.

UKhomishina weZEC, uMnu. Qhubani Moyo, ukhuthaze abafundisi abasuka endaweni ezinengi kwele Zimbabwe ukuba bancedise ngokufundisa amakholwa ngokhetho ngoba inengi lilahlelekile.

Inhlanganiso esebenza ledale lephalamende eZimbabwe, i SAPST ithi seyakhulimisana leZEC mayelana lokuhlomisa abantu ngolwazi lokuvota njalo basebenza lenhlanganiso ezimbalwa ngemizamo yokuthi abantu bazi njalo baphatheke ekhethweni.
UMqondisi wenhlelo eSAPST, uMnunzana Henry Ndlovu obesemhlanganweni weZCA uthe sebelinde iZEC ukuba baqale ukufundisa abantu ngezokhetho okugoqela uhlelo olweBVR.

UNkosikazi Luwiza Mangisa, osuka ebandleni leWord of Life, uthe bafuna ulwazi olunengi ngohlelo lweBVR ngoba lesikhathi sesihambile.

Kuthi uNkosikazi Sigezile Zikhali weAnglican Church St. Mary’s Famona uthe isikhathi sifitshane njalo imfundiso enengi kumele iye emaphandleni.

Abe ZEC babika ukuba lokhe belinde imitshina yokubhalisa ukuvota besithi noma umuntu engela ncwadi elekheli ulakho ukubhalisa ukuvota loba elesithupha ngoba ezabhala lokho okuthiwa yi-affidavit ekhomba ukuba uhlala kuphi kodwa bethi ozafumanwa ebhalise kabili uzabotshwa lebizo lakhe likhutshwe kuluhlu lwabazavota.

Kulabo abangelancwadi zekheli bamele baye lapho okubhaliswa khona ukuvota lesithupha bazancediswa basayine iaffidavit babhalise ukuvota ngoba kulilungelo lomuntu wonke ukuvota bethi bakhangelele ukuba abantu abafika izigidi eziyisikhombisa bazabhalise ukuvota.

Facebook Forum

XS
SM
MD
LG