amalinks wokungena

Breaking News

Amalunga Ephalamende Ahlolwa Igciwane LeHIV


Amalunga edale lephalamende aqalise ukuhlolwa igazi ngoLwesithathu ukuze azi ukuthi alegciwane lengculazi yini kumbe hatshi.

Loluhlelo lukhangelelwe ukuphela ngoLwesihlanu. Amalunga edale ahlolwe igazi ngoLwesine akhuthaze inkokheli kahulumende egoqela umkhokheli welizwe lenhloko kahulumende ukuthi labo benze okufanayo ukuze babe yisibonelo esihle kuzulu.

Umlawuli wedale lephalamende uMnu Lovemore Moyo uthshele intathelizindaba ukuthi kungaba yisibonelo esihle emphakathini nxa iziphathamandla zikahulumende zingayahlolwa igazi.

Amanye amalunga edale awesilisa akhangelelwe ukusokwa, okuyindlela efiphaza amathuba abesilisa ukubamba igciwane leHIV nxa bethe baya emacansini bengagqokanga ijazi lomkhwenyana.

Uhlelo lolu lukhokhelwa yinhlanganiso yamalunga edale ekhangelane lokulwisana lomkhuhlane weAids, iZimbabwe Parliamentarians Against HIV/Aids.

Umgcinisihlalo walinhlanganiso uMnu Blessing Chebundo utshele iStudio 7 ukuthi seledlula amatshumi ayisithupha inani lalabo asebehloliwe okwamanje okugoqela izisebenzi zedale.

UChebundo ngomunye wabahloliweyo. Balikhulu lamatshumi ayisikhombisa lanhlanu, 175, abangamalunga alinhlanganiso. Kodwa abalikhulu yibo abazinikele ekuthini bahlolwe.

Ukuhlaziya udaba lolu uNtungamili Nkomo weStudio 7 uxhume ilunga ledale lephalamende njalo engumsekeli wesikhulumeli seMDC ekhokhelwa nguMnu Morgan Tsvangirai uNkosazana Khumalo, ongomunye wabahlolwe igazi, loMnu Obert Banda owenhlanganiso yeZimbabwe National Network of People Living With HIV/Aids.

Bobabili bathi yinto enhle kakhulu enziwe ngamalunga edale.

XS
SM
MD
LG