Inengi lezizalwane zeZimbabwe ezisebenza kweleSouth Africa zithi zilikhangele ngamehlo abomvu ilanga leKhisimusi njengoba kuyiso isikhathi esihle sokuphumula labangane lezihlobo. UBenedict Nhlapho uxoxa labeZimbabwe laba ngamacebo, inhloso lalokho abazabe bekwenza ngeKhisimusi yalonyaka.
Ngemva kokusebenza umnyaka wonke kungayiwa ekhefini, inengi lezizalwane zeZimbabwe kweleSouth Africa bathi bazathatha ikhefu linyanga ukuze bayidle kahle iKhisimusi belezihlobo labangane eZimbabwe.
Ukuwa kwezomnotho eZimbabwe kwachitha ubungane obunengi njengoba abanye baqonda emazweni atshiyeneyo kuzwekazi leAfrica, abanye baya eEurope kwathi abanye balubhekisa Emelika, bonke befulathela imuli zabo eZimbabwe.
NgeKhisimusi yalonyakake inengi lithi loba kungaba nzima ngeke bekele ukuyabonana lezihlobo labangane ekhaya ngeKhisimusi.
Umnumnzana Fortune Ndebele odabuka eKezi ezansi yakwelemandebeleni esigabeni seLingwe phansi kwenduna uBhidi, uthi kabukho ubunandi obuseGoli obungenza bakhuthe ukuya ekhaya ngekhisimusi.
UMnumnzana Goodwell Ndlovu odabuka ePlumtree yena uthi intokozo iyaphuphuma kuye njengoba sekuselenje ukuthi avale emsebenzini angene indlela.
Lolulangatho lokudlalela ikhisimusi ekhaya lukhulu okokuthi lalabo abazavala emisebenzini sekuselenje amahola ambalwa ukuthi ikhisimusi iqale labo bathi bazabhekisa amabombo ekhaya. Umnumnzana Naison Sibanda odabuka eNyamayendlovu ngomunye wabo.
Umculi weZimbabwe UMarvelous Sibanda yena ukhuthaza abeZimbabwer laba ukuthi nxa sebefika ekhaya lamafidlongo lezibiliboco bengakhohlwa ukunakakela abayanga labampofu.Loba kunjalo kakusibo bonke abajabulileyo ngalesi sikhathi.
Abanye bathi ikhisimusi bazayidlalela lapha njengoba bezabe besemsebensini. Bakhona njalo abathi isifiso sokuya ekhaya sikhona kodwa imali yiyo engekhoyo.
Abanyeke abafana lentathelizindaba yeZimbabwe uMxolisi Ncube bathi kabazukuya ekhaya ngale ikhisimusi ngenxa yesimo sezombusazwe.
Loba kunjalo laba labo bathi bekhonangapha eGoli labo ngekhisimusi bazatshona bezitika bagide kuze kuse.