Inkulungwane lenkulungwane zabantu zizalubhekisa enkundleni eyeWhite City Stadium koBulawayo embuthanweni womthandazo wokuvalelisana leqhawe elalwa impi yenkululeko, uDr Dumiso Dabengwa obhubhe ngoLwesine lweviki edluleyo kweleKenya evela kwelatshwa kweleIndia.
Imuli kaDabengwa ithi ngokusebenzelana labakaHulumende sebefike esibangeni esiphezulu samalungiselelo ombuthano omkhulu womthandazo wokuvalelisana laleli qhawe ngoLwesihlanu.
Umbuthano womthandazo wokuvalelisa iqhawe elalwa impi yenkululeko ekuviyo lebutho ele Zipra njalo abantu bakhuthazwa ukuthi baqale ukulubhekisa enkundleni ekuseni usandulela owokucina wokubekwa kwakhe NgoMgqibelo ekhaya lapho adabuka khona eManxeleni eNtabazinduna.
UMnawakhe kamuyi okhulume emmele imuli, uMnumzana Sipho Dabengwa uchasise ngamalungiselelo omsebenzi wangoLwesihlanu.
“Abantu bazathwalwa ngamabhasi ukusuka eLarge City Hall besiya enkundleni yeWhite City Stadium ngabo 9 ekuseni. Abahamba ngezimotha kabahle baqonde enkundleni, ihearse izalandela emuva. Abavela phandle kwako Bulawayo uhulumende uselungise amabhasi azathwala abantu endaweni ezitshiyeneyo,” kutsho umfokaDabengwa.