amalinks wokungena

Breaking News

I-Mighty Warriors Inqoba i-Lesotho 8-0kuNkezo yeUnity Cup


Zimbabwe Mighty Warriors
Zimbabwe Mighty Warriors
Umqeqetshi weqembu elabesifazane elimela ilizwe emdlalweni kanobhutshuzwayo elaziwa ngokuthi ngama Mighty Warriors uRosemary Mugadza uthi ukungadlalwa kwemidlalo yeNational Super League sokuphazamise kakhulu abadlali baleliqembu ngoba sebephangisa ukudinwa.

UMugadza ubekhuluma ngemva komdlalo walonyaka owenkezo yeUnity Cup wona ophele iqembu le Zimbabwe libhuqe ele Lesotho ngemiklomelo eyithoba minwe mbili (8) ka nya enkundleni yeRufaro ngoMgqibelo odluleyo.

Lumqeqetshi uthi abadlali bakhe baphutshe umdlalo sebekhathele imbangela kuyikuba abasajwayelanga ukudlala ngoba lonyaka kungazange kube lemidlalo yeNational Super League.

Imidlalo yeSuper League ibidlalwa ngamaqembu aphuma kuwo wonke amagumbi amane akweleZimbabwe njalo ibisekelwa ngemali yinkampani emba amadayimani eyeMarange Resources nyakenye kodwa lonyaka ayizange ibekhona.

UMugadza uthi lokhu sekudale ukuba imizimba yabadlali bakhe ithambe njengoba lemidlalo yokuzwana amandla isiba khona ngemva kwesikhathi eside.

Ukunqoba kweqembu lama Mighty Warriors ngoMgqibelo kutsho ukuba leliqembu seliyiphakamise kathathu inkezo ye Unity Cup iminyaka ilandelana ngemva kokunqoba elikwenze ele South Africa ngo 2011 ikanti nyakenye linqobe ele Botswana.

Abahlohlele iqembu le Mighty Warriors ngabathi u Rutendo Makore olitshayele emambuleni kathathu, uFelistas Muzongodi ohlohle kabili kuthi eminye imiklomelo ivele ku Nokuthula Ndlovu, uMerjury Nyaungwe kanye lo Violet Bepete.

Abadlali bomdlalo kanobhutshuzwayo abake badla ubhedu ngensuku zabo bedlalela amaqembu ehlukeneyo kwele Zimbabwe bebethe gwaqa ngeNsonto edluleyo enkundleni yeWhite City KoBulawayo lapho okudlalwe khona umdlalo obuphakathi kweqembu leHighlanders Legends kanye lele Bulawayo Select.

Lumdlalo uphele iHighlanders Legends inqobe nge 5 ka 4 njalo abahlohlele ezimnyama ngenkani ngabathi u Collen Nyambiya yena olitshayele emambuleni kathathu kwathi eminye imiklomelo ivele kuEdmore Sibanda kanye lo Nkululeko Dlodlo.

Kucele le Bulawayo Select kuhlohle uAgent Sawu laye olitshayele emambuleni kathathu kwathi omunye umklomelo uvele ku Johannes Ngodzo.
Isikhulumeli seqembu leHighlanders Legends uMarko Dube uthi lumdlalo ubungowokuzilibazisa njengoba kuyisikhathi sekhefu

Kuqembu le Highlanders Legends bekulabadlali abagoqela uBekithemba Ndlovu, uMethembe Ndlovu, uGift Lunga Jnr, uAlexander Phiri, uSiza Khoza, uJohannes Tshuma, uDouglas Mloyi, uSimon Sibanda kanye lo Melusi Sibanda kuthi kuqembu le Bulawayo Select bekulabathi uRonald "Gidiza" Sibanda, yena ovotelwe ukuba ngumdlali odlale ukwedlula abanye, uLizwe Sweswe, uDazzy Kapenya, uJoseph Ngwenya, uChipo Tsodzo, uAubrey Sawuramba kanye lo Sikhumbuzo Banda.
XS
SM
MD
LG