amalinks wokungena

Breaking News

Amankampani Abukisa Ukudla Adinga Imikambo Elemali


Embukisweni ongenwe ngamankampani eZimbabwe ...
Embukisweni ongenwe ngamankampani eZimbabwe ...

Lobanje kulobunzima kwezomnotho eZimbabwe, asasekhona amankampani enza ukudla alokhu esenza ukudla okulohlonzi okuthakazelelwa kwamanye amazwe.

Umsakazo weStudio 7 uxoxe lamankampani enza ukudla eZimbabwe abeyingxenye yamankampani avela emazweni angamatshumi ayisikhombisa abekhangisa impahla zawo kweleSouth Africa embukisweni we Southern African International Trade Exhibition (SAITEX).

Isiphathamandla esibona ngokukhangiswa kwempala ezenziwa yinkampani yeLobels ezigoqela isinkwa, amabhisikiti, iziwiji lokunye, uMnumnzana David Lecluse, uthi lobanje kukunengi okuphica inhlelo zamabhizimusi eZimbabwe, manengi amankampani akweleSouth Africa atshengise ukuthakazelela uhlonzi lokudla abakwenzayo.

Inkampani ye-Lobels ngenye yalawo aphuma emazweni angamatshumi ayisikhombisa abebukisa impahla embukisweni we SAITEX, kwele South Africa.

Kunengi okubukiswe ngamankampani eZimbabwe.
Kunengi okubukiswe ngamankampani eZimbabwe.

Le yinto engeneliswa ngamankampani amanengi kakhulu eZimbabwe njengoba inengi lawo asavalwa, kumbe asasala lezisebenzi ezilihlekana.

UMnumnzana Lecluse uthi iLobels ilokhu isaqinile kanti zinengi izithembiso zokuthengiselana abazitholileyo embukisweni we SAITEX abazazilandelela ngemva kombukiso lo.

“Abantu bathokoze kakhulu ngohlonzi lokudla esikwenzayo, ikakhulu nxa sikhangela ukuthi siyinkampani yeZimbabwe lapho okulohlupho khona ekungeniseni elizweni izinto esenza ngazo ukudla okutshiyeneyo. Inengi lamankampani lifuna ukuthengisa ukudla kwethu la kweleSouth Africa ngoba bathi kulohlonzi kanti njalo kulentengo ephansi.”

UNkosazana Mercy Kunaka, owenkampani ye Associated Food Zimbabwe obona ngokuthengiswa kwempahla kunkampani le, uthi ukudla kwabo okusemagabheni okugoqela izithelo lemibhida kanye ledobi, bekukhanga abanengi kulo umbukiso okubapha ithemba lokuthi labo basancintisana lamankampani amakhulu eAfrica.

“Inengi labethekelele lapho ebesikhangisa khona bathathekiswe yikudla kwethu okusemagabheni okugoqela izithelo, amatamatisi ledobi. Idobi lethu bayalincoma besithi kalijwayelekanga okuyinto esithokozisayo ukuthi silethe ukudla okulomehluko.”

UMnumnzana Andre Torr, isiphathamandla se nkampani ye Chicky Chilli eyenza okwehlukileyo ngebilebile, uthi amankampani amanengi akhanya etshengisa isifiso sokuthenga ukudla abakulungisayo.

Abesifazana babukise impahla enengi okumangalisayo.
Abesifazana babukise impahla enengi okumangalisayo.

“Sithole izifiso ezinengi zamankampani atshiyeneyo afisa siwathengisele lokhu esikwenzayo. Le yinto esikhuthazayo kakhulu, ngoba sizabuye sixhumane lamankampanila sikhuluma ngendlela esingasebenzisana ngayo.”

UNkosikazi Fran Patrika, obona ngezokuthengiswa kwempahla kunkampani ye Baobab Private Limited, uthi balima izihlahla zomkhomo baphinde bathenge njalo umkhomo ebantwini besebewuthengisa emazweni ngitsho laphetsheya.

Ibikhona layo inkampani yeZimtrade.
Ibikhona layo inkampani yeZimtrade.

Ngalo umkomo benza iziwiji, ijemu lokunye ukudla okutshiyeneyo.

Uthi njangamankampani eZimbabwe bathokoziswe kakhulu yindlela amankampani akwamanye amazwe abethakazelela ngayo ukudla lempahla abazenzayo.

“Sifuna ukuthengisela impahla zethu emankampanini akweleSouth Africa siphinde futhi singene kwamanye amazwe atshiyeneyo.”

Isimo esibi kwezomnotho eZimbabwe sesibangele ukuthi amankampani amanengi avalwe izinkulungwane zabantu balahlekelwa yimisebenzi. Uhlupho olukhulu olubhekane lamankampani yibunzima bokuthenga phandle kwelizwe imitshina yokusebenzisa kanye lezinye izinto abazisebenzisa ukwenza impahla ezitshiyeneyo.

XS
SM
MD
LG