amalinks wokungena

Breaking News

Uhulumende Uvalela Amankampani Ukuthi Athenge Umlilo Kagetsi Emazweni - CZI


Umqondisi we Confederation of Zimbabwe Industries (CZI) uMnu. Joseph Kanyekanye uthi uhulumende uyala ukuthi amankampani azithengele umlilo kagetsi kwamanye amazwe ukuze engaphazamiswa umsebenzi wokulungisa impahla ngokusilela kwamandla kagetsi.

Umnu. Kanyekanye utshele umhlangano omkhulu we CZI eVictoria Falls ngoLwesithathu ukuthi amankampani amanengi afuna ukuthi athenge umlilo kagetsi emazweni kodwa uhulumende uthi kumele athenge lumlilo eZimbabe Electricity Supply Authority (ZESA) kuphela.

Uthe loba nje kulamankampani amahlanu aphiwe imvumo yokuphehla umlilo kagetsi ezimele wodwa, awabonakali ukuthi enzani.

Uphinde wathi amankampani amanengi eZimbabwe abhekane lobunzima bokungatholi izikwelede emabhanga osokwenze ukuthi amanye adilike kumbe athuthele kwamanye amadolobho.

Umqondisi we Matabeleland Confederation of Industries uNkosikazi Ruth Labodeuthi ukuthi akusimlilo kagetsi kuphela ohlupha amankampani elizweni.

Umnu. Isaac Mabuka omele isigaba seMatabeleland ku Zimbabwe National Chamber of Commerce uthi kuyasinda ukuthi uhulumende avumele amankampani ukuthi athenge umlilo kagetsi emazweni.

Ukuhlaziya okuhlupha intuthuko yamafekithali elizweni, iStudio 7 ixoxe loMnu Walter Nsununguli Mbongolwane, ingcwethi ecubungula ezombusazwe, loMnu. Edwin Ndlovu, isiphathamandla secele le Movement for Democratic Change elikhokhelwa nguMnu. Welshman Ncube.

XS
SM
MD
LG