amalinks wokungena

Amantombazana Athola Uncedo Lwemfundo Kuhlelo Lwe World Vision


Akade bekhuluma ngohlelo lweWorld Vision International.

Inhlanganiso ephathisa amazwe womhlaba eye World Vision International ngoLwesithathu yethule umbiko oqakathekileyo wokuphumelela kohlelo lwabo lokuthuthukiswa kwamantombazana kwezemfundo, oluphansi kwesihloko esithi ‘Improving Girls Access through Transforming Education’ abaluqhube eziqintini ezilitshumi zelizwe.

Obona ngokuqhutshwa kohlelo lweIGATE enhlanganisweni eyeWorld Vision International, uMnu. Mvelo Mjimba, uchaze ukuba eziqintini ezilitshumi abasebenze kizo ezibalisa iBeitbridge, Insiza, Mangwe, Lupane, Nkayi. Binga, Chivi, Mberengwa, Gokwe South leGokwe North inani lamantombazana aqhubeke iminyaka emina besiza esikolo likhuphukile.

Uthe lokhu kwenzakale lalapho okwembiwa khona amatshe aligugu. Uphinde wathi abantwana abangabafana labo bebengayi esikolo kodwa ngemva kohlelo lweIGATE bacine besiya ezikolo.

Izikolo ezingamakhulu amane lamatshumi ayisithupha lasikhombisa ezingangaphansi kohlelo lweIGATE lapho amantombazana adlula inkulungwane ezilikhulu atholiswa usizo kusukela ngomnyaka ka2013 lwaphela kunyanga edlule.

Obona ngezemfundo eMatabeleland North, uNkosikazi Boitatelo Mguni, uthe yebo amantombazana asahamba umango omude kodwa abazali lohulumende baphakathi kokukwenqabela lokho ethi lakwezinye indawo abazali sebezakhela izikolo uhulumende angcede ngokuletha otitshala lamabhuku lokunye okudingekayo.

UMnu. Shadreck Khuphe weSNV laye uthe kuyaziwa ukuba abafundi bahamba imango emide besiya esikolo njalo labazali endaweni ezibalisa iBinga, iGokwe leBeitbridge balakho ukubhadala imali yesikolo ngezililmo kumbe ngezifuyo ngakho uhlelo lukahulumende lokuvumela abazali luza ngenxa yokusilela kwemali ezweni.

Uhlelo lwe IGATE lutholiswe imali efika izigidi ezilitshumi lane yinhlanganiso yeBhilithane eyeUK AID ngaphansi kohelo lweGirls’ Education Challenge olwadonsa iminyaka emine njalo iWVI iphakathi kokukhankasela ukuthola eyinye imali.

Phansi kohlelo lweIGATE, amabhayisikili afika inkulungwane ezingamatshumi amabili lanhlanu abelwe abafundi ukuba bafinyelele masinya esikolo.

Abesilisa abazinkulungwane ezintathu bafundiswa ukukhankasela ukufunda kabantwana abangamankazana eziqintini ezilitshumi ezingaphansi kweIGATE.

Phezu kwalokho, abafundi batholiswa amabhuku, ababalisi labo bafundiswa ukukhuphula indlela abafundisa ngayo.

Uhlelo lweIGATE luveze ukuba abantwana abangamantombazana abalemisebenzi eminengi emakhaya yibo futhi abaphinde bahambe imango emide besiya esikolo obekucina kubenqabela ukuqhubeka besiya esikolo.

Ngenxa yokusilela kwemali, abafundi kade bengaphutshi izifundo kodwa ngokuza kohlelo lweIGATE, abafundi sebesenelisa ukuya esikolo uhulumende ethi lohlelo lwakhe lokubhadalala imali yesikolo ngembuzi lulakho ukwenqabela ukuqansa kwenani labafundi abangayi esikolo ebonga lohlelo lweIGATE ngoba lululaza umthwalo kahulumende.

Facebook Forum

XS
SM
MD
LG