amalinks wokungena

Breaking News

Amanye Amazwe Kumele Angenele Kudaba LweZimbabwe - Tsvangirai


Inhloko kahulumende uMnu Morgan Tsvangirai uthi amazwe omhlaba kumele angenele kudaba lweZimbabwe ukuze ukhetho oluzayo lube ngolukhululekileyo.

UTsvangirai wethule amazwi la eseBhilithani ngaphambilini komhlangano wezamabhizimusi awungene ngoMvulo wokuhlaziya ezamabhizimusi ezwekazi leAfrica.

Ekhuluma emhlanganweni lo uTsvangirai uthe osomabhizimusi kumele baze eZimbabwe ngoba emanengi amathuba amabhizimusi, ikakhulu kwezemigodi.

Ugcizelele wathi lanxa kusakunengi okumele kwenziwe ukulungisisa udaba lweZimbabwe, umumo okhona kathesi ulungele amabhizimusi.

Uthe njalo abakwamanye amazwe akumelanga besabe umthetho weIndigenization and Economic Empowerment Act ngoba ungasoze ubaphazamise.

Ekhuluma lephephandaba leLondon Times ngeSonto uMnu Tsvangirai uthe umhlaba kumele ungenele kudaba lweZimbabwe ukuze kwenziwe ukhetho olukhululekileyo.

Isikhulumeli seMDC-T, uNkosazana Thabitha Khumalo ugcizelele amazwi kaTsvangirai. Kodwa ingcwethi ecubungula ezombusazwe uMnu Nkululeko Sibanda uthe akaboni abakwamanye amazwe, ikakhulu angentshonalanga bengenela kudaba lweZimbabwe.

XS
SM
MD
LG