amalinks wokungena

Breaking News

'Iyozala Nkomoni ngo2017 Lapho Amapermits eSouth Africa Ephela Ukusebenza'


Izizalwane zeZimbabwe ebeziseSouth Africa ngokungekho emthethweni ezaphiwa amapermit oxolo ngo 2010, zithi seziphakathi kokuhlela ukukhulumisana lohulumende weZimbabwe ukuthi axumane lowe South Africa ukuze angabaxotshi elizweni nxa amapermit la ephelelwa yisikhathi ngo 2017. UBenedict Nhlapho udingisisa kabanzi ngezizatho zaleli nyathelo njengoba uhulumende wele South Africa wakubeka kwacaca ukuthi bonke abalamapermit la kuzafuze babuyele kubo ekupheleni kuka2017.

Kwabayinjabulo enkulu ngo 2010 ngesikhathi uhulumende wakwele South Africa esithi bonke abeZimbabwe abaselizweni ngokungekho emthethweni kabaze bazothola imvumo kungelambuzo.

Umnumzana Malusi Gigaba umpathintambo wendaba zasekhaya kwele South Africa
Umnumzana Malusi Gigaba umpathintambo wendaba zasekhaya kwele South Africa

Kodwake umphathintambo wogatsha lwendaba zasekhaya kweleSouth Africa umnumnzana Malusi Gigaba usekubeke kwacaca ukuthi bonke abalamapermit la kuzafuze babhekise amabombo ekhaya ekupheleni kuka2017.

Le yinto esilethe ukudana kakhulu kuzizalwane zeZimbabwe ezinye ebesezileminyaka edlula itshumi zihlala kweleSouth Africa. Umgcinisihlalo weZimbabwe Community in South Africa umnumnzana Ngqabutho Mabhena uthi bafuna uhulumende weZimbabwe ancedisane labo ekuxazululeni loluhlupho.

“Sivumelene ukuthi sizazama konke okusemandleni ethu ukuthi evikini yesibili ekaFebruary sike sivakatshele eHarare siyedibana lobabauChombo uMinister. Simchasisele njengo Minister we Home Affairs ukuthi nanzi izikhalo ezikhona, simbekele sizwe laye ukuthi nxa esizwa lezo zikhalo yena uthi kungenziwani.”

Esinye isizalwane seZimbabwe umnumnzana Nkosikhona Sibanda uthi kumnyama emuva laphambili njalo kabazi ukuthi iyozalwa nkomoni mhlaka 31 Mpalakazi 2017.

"Kunento ezinengi ezi involved. Kunabantwana esikolweni, kunamabond, kunama accounts nama investments umuntu ayabe lawo lana, ipermit ma I expeire after kuboma 3 years you ask youself ukuthi kuzokwenzakalani after that."

UMabhena laye uvumelana loSibanda esithi inkulu ingxabangxoza ezadalwa yikubuyiselwa emuva kwezizalwane zeZimbabwe lezi. Abanye sebeleZindlu kanti abanye baqhuba amabhizimusi kodwa engakafiki kubanga lokuthi bangaphiwa ipermit yabosomabhizimusi.

Kukhona laba abalabantwana abasesikolweni labo osekuzafuze batshiye baphindele ekhaya.

Abanyeke sebazala abantwana lezi zalwane zakweleSouth Africa kanti abanye abantwababo kabakaze balugxobe eZimbabwe njalo lencwadi zeZimbabwe kabalazo.

“Abanye bathi kunzima ukuthi impilo bayeqala kutsha babuyele ekhaya. Kantike futhi abanye bakhona babevele sebehlezi eSouth Africa kusiyafika u2010 osekusenza ukuthi abantu kube sokungathi kuba nzima ukuthi bakuzwsise ukuthi ngo 2017 kumele babuyele ekhaya.”

USibanda uthi into engabathokozisa yikuthi bekelwe baphile impilo zabo zingaphazanyiswanga.

“Bengifisa ukuthi at least kube lesolution eza accommodator abantu. Abantu abayabe bephila belemisebenzi yabo, belabantwana abasesikolweni, bebanikeze ama options beqhubeke ngempilo zabo njengoba beziphila njengamanje without compromising them emsebenzini or ezikolweni for abantwana. Lalabo abalama investments beqhubeke ngama investments abo.”

Uthike ithemba labo selisekuthini uhulumende weZimbabwe loweSouth Africa bazabahlenga kuloluhlupho.

UMabhena yena uthi okwamanje baphakathi kokukhangelisisa ukuthi zingaki izizalwane zamapermit ezilelungelo lokuthola olunye uhlobo lwamapermit abalisa awezisebenzi ezingatholakali lula kweleSouth Africa, awemitshado lababhizimusi.

UMabhena ukhuthaza izizalwane zeZimbabwe ukuthi zizizambe, ziphile kahle kwele South Africa hatshi ukwaziwa ngezinto ezimbi, ngoba lokhu kungenza yonkele imizamo ingaphumeleni.

XS
SM
MD
LG