Kulandela imbiko ethulwe yinhlanganiso yeCenter for Research and Development eyokuthi kuntshontshwa amadayimana amanengi ngelanga emigodini yeMarange, amapholisa abikwa sedinga umqondisi walinhlanganiso uMnu Farai Maguwu ngamehlo abomvu njalo abophe umnewabo uReason Maguwu ngoLwesine.
Igqwetha likaFarai Maguwu, uMnu Blessing Nyamaropa uthi amapholisa eMutare ahambe ewofisini yenhlanganiso kaMaguwu ngoLwesine lapho afuze afuza khona ngoLwesine. Esuka lapho amapholisa abikwa eqonde emzini kaMaguwu, eHobhouse kodwa amswela asebopha umnewabo.
Sikhulumanje uReason Maguwu kazakali ukuthi ungaphi njalo amapholisa eMutare ayakulandula ukuthi usezandleni zawo. Imbiko yokuntshontshwa kwamadayimana eMarange isolwe kakhulu ngumphathintambo wezemigodi uMnu Obert Mpofu oyethese uMaguwu umlandu wokuba ngumthengisi, kungxoxo ayenze loNtungamili Nkomo weStudio 7.
Kunjalo nje isithunywa seKimberly Process uMnu Abbey Chikane ugqibe uhambo lwakhe eZimbabwe ngoLwesihlanu. UMnu Chikane utshayele uhulumende ihlombe ngoLwesine esithi selandela izixwayiso zeKimberly Process, esithi inhlanganiso le sokumele ivumele iZimbabwe ukuthengisa amadayimana eMarange.
