Amapholisa abhaxabule kabuhlungu abekade bebuthana belungiselelela ukufola betshengisela belubhekise emahofisini kasibalukhulu webhanga elikhulu lelizwe, inengi labo kungabasakhulayo bomkhankaso we#Tajamuka/ Sesijikile, besiyakhonona ngodaba lwama Bond Notes afuna ukulethwa elizweni.
Amapholisa edlula amatshumi amahlanu, afike ngemota ezimbalwa, amane aqala ukuhlasela uzulu obuthane okuhlangana khona umgwaqo uJulius Nyerere loJason Moyo, abantu belungiselela ukufola belubhekise emahofisini ebhanga elikhulu lelizwe.
Abaze kulokhu kutshengisela inengi labo kungontanga, benhlanganiso ezehlukeneyo ezibumba umkhankaso weTajamuka/Sesijikile, bebephethe amaluba lamabhakana alotshwe imibiko ehlukeneyo.
Akusabanga njalo, ngoba besabalaliswe ngamapholisa la, etshaya wonke obetholakala elokhe ekulendawo, kwalinyazwa abambalwa.
Lokhu kwenza kwamapholisa kusolwe kakhulu nguzulu lentathelizindaba. Omunye wabo kunguMlondolozi Ndlovu.
Usole njalo lesenzo samapholisa ukufuna ukutshaya intathelizindaba ebeziziqhubela umsebenzi, wancoma ukuzimela kwazo lapho zisala ukwethuselwa.
Abekade betshengisela laba, bebefuna ukuyakwethula incwadi yabo yezikhalazo kusibalukhulu webhanga le Reserve Bank of Zimbabwe, bekhuthaza uhulumende ukuthi ehlukane lokubalethela imali yephepha yama bond notes.
Kubikwa kulimale abantu abangafika abalitshumi lanhlanu kudlakela lolu lokutshaywa kwabantu ngamapholisa ohlangothi lweRiot. Abanye babalimele kakubi bagoqela unobhala jikelele wonhlangothi lwabasakhulayo kubandla leMDC-T uLovemore Chinputsa kanye lentathelizindaba esebenza izimele uJames Jemwa othsaywe ekhanda.
Abantu laba bebehlabela ingoma, inengi lazo ebezichothoza umbuso kamongameli Robert Mugabe leZanu PF, besithi sezehlulekelela kungakho kumele asuke embusweni.
