amalinks wokungena

Breaking News

Amapholisa Avalela Amalunga Ecele LeMDC Elikhokhelwa NguNcube


Amapholisa eHwange ngoLwesibili atshone evalele iziphathamandla zebandla leMDC elikhokhelwa nguMnu Welshman Ncube azikhulula kusihlwa engazethesanga cala.

Abatshone bevalelwe laba bagoqela isikhulumeli sebandla uMnu Nhlanhla Dube, uMnu Qhubani Moyo, uMnu Noble Malunguza loNkosazana Rita Ndlovu.

Abane laba bebevalelwe ndawonye lamagqwetha amathathu ekade elanda ukuyamela umfundisi weRoma uFather Marko Mkandla. Amagqwetha la abalisa uMnu Lizwe Jamela, Nikiwe Ncube loNosimilo Chanayiwa.

Iziphathamandla zeMDC zona bezilanda ukuyakuzwa icala eletheswa omunye wazo uMnu Moses Mzila Ndlovu ongumphathintambo obona ngohlelo lokuxolelana.

UMzila loMnkandla betheswa icala lokukhuthaza ukungezwani.

Ababili laba bavunyezwe ukuhlawula imali yesibambiso ngumtheththwandaba kamantshi engangamakhulu amahlanu amadollar-$500 ngamunye ukuba bakhululwe, njalo bazaphuma ngoLwesithathu.

Isikhulumeli salelibandla uMnu Nhlanhla Dube, usole amapholisa ngokutshona ebagcinile kungelasizatho.

Kunjalo nje, abakhulu bebutho babikwa bebize intathelizindaba zeNews Day ukuyachasisa ukuba ngubani owazinika udaba lokuthi isiphathamandla sebutho uMnu Constatine Chiwenga uyagula.

Intatheli lezi zizivikele ngokuthi zitshayelwe ucingo ngumuntu ezingamaziyo.

Udaba lolu luphume kunsukwana ezedluleyo njalo belusithi uChiwenga uhanjiswe kweleChina ukuyakwelatshwa ngoba engezwa kuhle.

Okuhambelana lalokhu

XS
SM
MD
LG