Amapholisa athi umumo welizwe usubuyelile esimeni sawo sansukuzonke njalo aseqalisile ukuqhuba umsebenzi wawo njengenhlalayenza encedisana lamabutho.
Ukubambisana iqhaza kwamapholisa lamasotsha lokhu yinto emangalisa abanengi abathi nxa ngempela umumo usuzinzile kungani ibutho liqhubeka lisezitaladeni.
Bekhuluma lentathelizindaba eHarare, abenhlangothi zombili baxwayise uzulu ukuthi ehloniphe imithetho yelizwe njalo edlelane kuhle lamabutho kanye lamapholisa ekusebenzeni kwawo.
Bathe amapholisa lamabutho azaqhubeka ehlolisisa umumo ezitaladeni zamadolobho, ikakhulu eHarare, ngenjongo yokulondoloza ukuthula ngoba kungumlandu wabo ukwenza lokhu.
Isikhulumeli samapholisa uSenior Assistant Commissioner Charity Charamba uthe kungumsebenzi wabo njengamapholisa ukulondoloza ukuthula, ukuvikela impilo kazulu kanye lempahla yakhe.
Usole izigilamkhuba ezibikwa sezithumbe amapulazi njalo zagqekeza izindlu zamalunga ecele leZanu PF eleG40 ebelilwisana loMongameli Emmerson Mnanagwa.
“Sesithole imbiko yabantu abantshontshayo njalo abanye ngabathumba amapulazi abanikazi lokugqekekza izindlu zabo. Yibudlova esingasoze sibuvumele lobu,” kutsho uNkosikazi Charamba.
Amazwi akhe agcizelelwe ngobona ngokwethulwa kwembiko kubutho, uColonel Overson Mugwisi.
Amapholisa abona ngokuhamba kuhle kwezimota asebuyelile emigwaqweni ngemva kokunyamalala kulandela ukugenqulwa kukahulumende kaMnu Robert Mugabe libutho.
Ukuze sihlaziye loludaba, uSithandekile Mhlanga weStudio 7 uxoxe lengwethi ecubungula ezemithetho uMnu. Kucaca Phulu.